Монгол Улс дахь хүний эрхийн боловсролын үндэсний чадавхыг дээшлүүлэх, бүс нутгийн улс орнуудтай туршлага, мэдээлэл солилцох, хамтын ажиллагааг өргөжүүлэх, боловсролын бүх түвшнийг хамарсан буюу СӨБ, ЕБС, мэргэжлийн болон техникийн боловсрол, дээд боловсролын хүрээн дэх хүний эрхийн боловсролын агуулгыг хэлэлцэж, матриц боловсруулах зорилготой “Хүний эрхийн боловсролын симпозиум" өнөөдөр /2025.07.02/ Улаанбаатар хотноо зохион байгуулагдаж байна.
“Хүний эрхийн боловсролын симпозиум 2025” нь дараах онцлогтой.
-Хүний эрхийн боловсролын төлөөх төрийн болон ТББ-ын хамтын ажиллагааг хангах;
-Өмнөх симпозиумын үр дүн, зөвлөмжийн хэрэгжилтийг тооцож үнэлгээ хийх;
-Бусад улс орны сайн туршлагыг түгээн дэлгэрүүлэх гэх зэрэг болно.
Симпозиумыг нээж ХЭҮК-ын дарга, хууль зүйн ухааны доктор Д.Сүнжид үг хэллээ. Мөн Улсын Их Хурлын гишүүн, Хүний эрхийн дэд хорооны дарга С.Эрдэнэболд, Тусгай үүрэг гүйцэтгэгч Элчин сайд Н.Энхбаяр нар хүндэтгэлийн үг хэлэв.
ХЭҮК-ын дарга, хууль зүйн ухааны доктор Д.Сүнжид хэлсэн үгэндээ “Хүний эрхийн боловсрол нь хүний үзэл санаа, амьдралын хандлагад эерэг өөрчлөлт авчирдаг бөгөөд аливаа нийгмийн тогтолцоо нь иргэдийн эрхээ мэддэг, үүргээ ухамсарладаг, хариуцлагатай оролцоотой байх үндсэн дээр тогтдог” хэмээн онцоллоо.
Дашрамд дурдахад, 2017 онд “Монгол улс дахь хүний эрхийн боловсролын өнгөрсөн, одоо, ирээдүй онол практикийн бага хурал”-ын Монголын Эмнести Интернэшнл, ХЭҮК, МУИС хамтран зохион байгуулсан. Мөн 2018 онд “Хүний эрхийн соёлыг бэхжүүлэх нь симпозиум”, 2023 онд “Хүний эрхийн боловсролын арга зүй” сэдэвт симпозиумын зохион байгуулсан нь зохих ахиц дэвшлийг бий болгосон юм.
