Ерөнхий сайд Л.Оюун-Эрдэнэ өөрт нь итгэл хүлээлгэх эсэх асуудлаар УИХ-д тогтоолын төсөл өргөн барьсан.
Уг тогтоолын төслийн тайлбартаа ийн бичжээ.
"УИХ-ын 2024 оны ээлжит сонгуулийн дүнд бүрдсэн 126 гишүүнтэй парламентад ард түмний дэмжлэг авсан улс төрийн намуудад өгсөн сонгогчдын саналыг гээхгүй байх суурь зарчимд үндэслэн, үндэсний эрх ашгийг нэгдүгээрт тавьж, МАН Засгийн газрын бүрэлдэхүүнд АН, ХҮН намыг урьж хамтарсан Засгийн газрыг байгуулсан.
Түүнчлэн, улс орны хөгжлийн тулгамдсан асуудал, сорилт бэрхшээлийг хурдтай, үр дүнтэй шийдвэрлэх, бүрэн эрхийнхээ хугацаанд бүтээлчээр, тогтвортой хамтран ажиллах зорилгоор “ХУРДТАЙ ХӨГЖЛИЙН ТӨЛӨӨХ ЗОРИГ” уриан доор хамтарсан Засгийн газрын гэрээг байгуулсан.
Тус гэрээг удирдлага болгон УИХ-ын 2024 оны сонгуульд дэвшүүлсэн МАН, АН, ХҮН намын мөрийн хөтөлбөрт суурилан боловсруулж, УИХ-ын 2024 оны 21 дүгээр тогтоолоор баталсан Засгийн газрын 2024-2028 оны үйл ажиллагааны хөтөлбөрийг хэрэгжүүлж, хөгжлийн мега төслүүдээ гацаанаас гарган, хэрэгжүүлж эхэлсэн.
Засгийн газрын үйл ажиллагааны хөтөлбөрт тусгасан Үндэсний баялгийн сан, хөгжлийн 14 мега төсөл, эрчим хүчний салбарын реформ, бүсчилсэн хөгжил зэрэг томоохон зорилтуудыг цаашид үр дүнтэй, тогтвортой хэрэгжүүлэхэд хамтын хариуцлагын зарчим нэн чухал юм.
Хамтарсан Засгийн газрын гэрээнд “...улс төрийн нөхцөл байдал үүссэн тохиолдолд талуудын намын төлөөллийн төв байгууллагаар хэлэлцэж эцэслэн шийдвэрлэнэ” гэж заасны дагуу МАН-ын Бага хурлаас 2025 оны тавдугаар сарын 21-ний дөрөвдүгээр тогтоолыг баталж, хамтарсан Засгийн газрын гэрээг зөрчсөн улс төрийн намыг оролцуулахгүйгээр Засгийн газрыг бүрдүүлэх шийдвэрийг гаргасан.
Өөрөөр хэлбэл, хамтарсан Засгийн газрыг байгуулсан улс төрийн нэг хүчин Засгийн газраас гарах нөхцөл байдал үүссэн тул Ерөнхий сайд миний бие хамтын хариуцлагын зарчим, улс төрийн соёлын хувьд Улсын Их Хурлын бүрэн эрхийг хүндэтгэн, итгэл үзүүлэх эсэх асуудлыг ард түмний төлөөллийн төв байгууллагаар шийдвэрлүүлэх нь зүйтэй гэж үзлээ.
Үндсэн хуулийн Дөчин нэгдүгээр зүйлийн 1 дэх хэсэгт “Ерөнхий сайд Засгийн газрыг удирдаж, төрийн хууль биелүүлэх ажлыг УИХ-ын өмнө хариуцна” гэж, Засгийн газрын тухай хуулийн 24 дүгээр зүйлийн 1 дэх хэсэгт “Засгийн газар УИХ-ын итгэлийг хүлээсэн байвал зохино” гэж тус тус заасан.Иймд Үндсэн хуулийн Дөчин дөрөвдүгээр зүйлийн 1 дэх хэсэг, Засгийн газрын тухай хуулийн 24 дүгээр зүйлийн 2 дахь хэсэгт заасны дагуу цаашид хамтарсан Засгийн газрын үйл ажиллагааны хөтөлбөрт дэвшүүлсэн бодлого, зорилтыг тууштай хэрэгжүүлэхэд бодлогын дэмжлэг шаардлагатай байгаа тул “Монгол Улсын Ерөнхий сайдад итгэл хүлээлгэх тухай” УИХ-ын тогтоолын төслийг хэлэлцүүлэхээр хүргүүлж байна.
Тогтоолын төсөл нь Ерөнхий сайдад Үндсэн хуулиар олгогдсон бүрэн эрхийн хүрээнд УИХ-д оруулж байгаа асуудал тул Хууль тогтоомжийн тухай хуулийн 12 дугаар зүйлийн 12.2.9 дэх заалт, 14 дүгээр зүйлийн 14.1 дэх хэсэг, 38 дугаар зүйлийн 38.9 дэх хэсэгт заасны дагуу хууль тогтоомжийн үзэл баримтлал боловсруулан батлах, судалгаа, үнэлгээ хийх болон олон нийтийн хэлэлцүүлэг зохион байгуулах шаардлагагүй болно.
Тогтоолын төсөл нь нийт 2 заалттай бөгөөд 1 дэх заалтаар УИХ-аас Ерөнхий сайдад итгэл хүлээлгэх тухай, 2 дахь заалтаар тус тогтоолыг дагаж мөрдөх хугацааг тогтоосон агуулга бүхий зохицуулалтыг Үндсэн хуулийн Дөчин дөрөвдүгээр зүйлийн 2 дахь хэсэгт заасантай нийцүүлэн тусгасан.
Тогтоолын төсөл нь Үндсэн хуульд нийцсэн, холбогдох бусад хуультай уялдсан бөгөөд Хууль тогтоомжийн тухай хуулийн 35, 36 дугаар зүйлд заасан шаардлагыг ханган боловсруулсан болно" гэжээ.
