Мьянмар улсад хүчтэй газар хөдлөлт болсноос хойш тав хоног өнгөрөөд байна. Газар хөдлөлтөөс хойш тус улсад газрын чичирхийлэл давтагдсаар байгаа нь аврагчдад тун ч хүнд нөхцөл байдлыг үүсгэж байгаа аж. Учир нь чичирхийллийн улмаас барилгууд нэмж нурж буй нь нурангиас амьд үлдсэн хүмүүсийг гаргах оролдлогод улам нэрмээс болж байна.
Мьянмарын цэргийн эрх баригчдын мэдээлснээр 7.7 баллын хүчтэй газар хөдлөлтийн улмаас 2700 гаруй хүн амиа алдаж, олон мянган хүн шархадсан байна. Мөн хэдэн зуун хүн сураггүй хэвээр байгаа ба амиа алдагсдын тоо өсөх нь тодорхой гэж үзэж байна.
Газар хөдлөлт болсноос хойш нуранги дах хүмүүс амьд үлдэх боломжтой "Алтан цаг" хэдийнээ дууссан. Гэхдээ өнөөдөр Нейпидо хотод газар хөдлөлт болсноос хойш 100 гаруй цагийн дараа ажилчид нурангиас нэг хүнийг амьд гаргаж авч чаджээ. Мөн өчигдөр Нейпидо хотод 62 настай эмэгтэйг нурсан бетонон хавтан дундаас эсэн мэнд гаргасан байна.
Даваа гарагт Хятадын аврагчдын баг таван настай хүүхэд, жирэмсэн эмэгтэй зэрэг дөрвөн хүнийг нурангиас гаргажээ.
