Зимбабвегийн иргэн Кирсти Ковентри Олон улсын Олимпын хорооны /ОУОХ/ анхны эмэгтэй бөгөөд анхны африк гаралтай ерөнхийлөгчөөр сонгогдлоо. Өдгөө 41 настай, усанд сэлэлтийн Олимпын хошой аварга тэрбээр спортын удирдах дээд байгууллагын хамгийн том албан тушаалд сонгогдсон хамгийн залуу хүн болж байна. К.Ковентри бүрэн эрхийнх нь хугацаа нь дуусаж буй Томас Бахын халааг авч үг хэлэхдээ, өөртэй нь өрсөлдсөн зургаан хүнтэй хамтран ажиллахаа мэдэгджээ.
“Энэ бол ер бусын мөч. Би есөн настай бяцхан охин байхдаа хэзээ нэгэн цагт энд зогсож, Олимпын хөдөлгөөнийг удирдах завшаан тохионо гэж төсөөлж ч байгаагүй. Өнөөдөр гаргасан шийдвэрээрээ та бүхэн бахархах болтол би ажиллах болно. Чин сэтгэлээсээ талархлаа илэрхийлье” гэж К.Ковентри хэлэв.
Т.Бахын дэмждэг нэр дэвшигч гэгдэж байсан К.Ковентри ОУОХ-ны ахмад зүтгэлтэн, бага Хуан Антонио Самаранч, Дэлхийн хөнгөн атлетикийн холбооны тэргүүн Себастьян Коу нартай ширүүн өрсөлдөнө гэж таамаглаж байсан юм. Гэсэн хэдий ч санал хураалтын эхний шатанд 97 гишүүний 49 нь түүнд саналаа өгсөн нь ОУОХ-ны гишүүд түүнд өндөр итгэл хүлээлгэснийг харууллаа. Х.Самаранч 28 санал, Олимпын хошой аварга С.Коу найман санал авчээ.
