Японы мэргэжлийн сүмо бөхийн гуравдугаар сарын Харү башё Осака хотод үргэлжилж байна. Хаврын башёд 74 дэх ёкозүна Хоошёорюү С.Бямбасүрэнгээр манлайлуулсан Монголын 21 сүмоч таван зиндаанд хүч үзэж буй. Ёкозүна цолтойгоор анхны башёдоо барилдаж буй Хоошёорюү С.Бямбасүрэн анх удаа гараагаа хүндхэн эхлүүлж, нийт есөн барилдааны дөрөвт нь ялагдал хүлээсэн юм.
Тэрбээр өчигдрийн барилдааны дараа баруун гарын тохой болон хүзүүний шөрмөсний бэртлээ эдгээх шаардлагатай тул гуравдугаар сарын башёг өнжихөөр болсон гэж мэдэгдлээ. С.Бямбасүрэнгийн хувьд мэргэжлийн сүмогийн их аварга цол хүртсэний дараах эхний тэмцээн энэ байв. Олон удаа өвдөг шороодсон тул түрүүлэх магадлал ч багассан гэж хэлж болно.