УИХ-ын гишүүн Б.Мөнхбаясгалан "Энержи Ресурс" компанийн талаар мэдээлэл хийлээ. Тэрээр Ухаа худагийг "Энержи Ресурс" компани луйвардаж авсан гэлээ. Ухаа худагийн асуудлаар УИХ-ын хянан шалгах түр хороо байгуулан ажиллуулахаар өнөөдрөөс гарын үсэг цуглуулж эхэлж байгаа юм байна. УИХ-ын 32 гишүүн дэмжиж гарын үсэг зурснаар УИХ-ын хянан шалгах түр хороо байгуулах боломжтой.
Л.Мөнхбаясгалан “Миний сонгогдсон говийн бүсэд Монголын сангийн авдрыг дүүргэдэг стратегийн томоохон ордуудад байдаг. Зөвхөн Өмнөговь аймаг улсын төсөвт 1.7 их наяд төгрөгийн орлого төвлөрүүлдэг. Миний сүүлийн 15 жилийн амьдрал Монголын олигархуудын эсрэг чиглэсэн байсан.
Монголын уул уурхайн баялгийг авахын тулд өөрсдөдөө зориулсан хууль батлуулдаг тэр хуулиа гаргаж хуу хамдаг, хулгай хийдэг, үе үеийн Засгийн газар, Ерөнхий прокурор, шүүх, цагдаагийн дарга нар, УИХ-ын дарга, Ерөнхийлөгч нартай хуйвалдсан сүлжээг эрэн сурвалжлах сэтгүүлч байхдаа удаа дараагийн нэвтрүүлэг, ярилцлага, нийтлэлээрээ дандаа илчилж байсан. Өөрийнхөө сүүлийн 15 жилийн турш цуглуулсан баримтуудыг авчирсан. Тавантолгой, Энержи Ресурс, Ухаа худаг, МАК, Петровис, Эрдэнэтийн 49 хувь, Худалдаа хөгжлийн банк, Төрийн банк болон бүх банкны хувьчлалын талаар бүх баримт байгаа.
Энэ дотроос Засгийн газар Ухаа худагийг "Энержи Ресурс" компани луйвраар авсныг мэдэгдээд УИХ руу тогтоолын төсөл оруулсан. Ухаа худаг манай говийн бүсэд байдаг. Надад бүх баримт хангалттай байсан. Удаа дараа энэ хулгайг илчилж байсан. Хэн ч тоогоогүй. Одоо тоож байна. Тиймээс Би Засгийн газрын байр суурийг дэмжээд УИХ дээр хянан шалгах түр хороо байгуулж ажиллахын төлөө өнөөдрөөс манлайлж ажиллана.
"Энержи Ресурс" компанийн 2009-2021 он хүртэл 12 жилийн хугацаанд илүү АМНАТ төлсөн гэж Засгийн газрын тогтоолыг хүчингүй болгох гэж шүүхэд өгсөн. "Энержи Ресурс" компани АМНАТ-ын хууль үйлчлэхгүй гээд Монголын төрөөс 209.6 тэрбум төгрөг нэхэмжилсэн. Гурван шатны шүүх хангаж шийдвэрлэсэн. Өнөөдөр Монгол Улсад нүүрсний зах зээл дээр үйл ажиллагаа явуулж байгаа бүх аж ахуйн нэгж, компани АМНАТ төлдөг. Ганцхан "Энержи Ресурс" компанид энэ хууль хамаагүй гэж байна. Яагаад гэхээр 23 жилийн хугацаатай буюу 2033 он хүртэл Засгийн газартай байгуулсан Тогтвортой байдлын гэрчилгээ гэж байгаа. Түүнийгээ бидэнд харуулах хэрэгтэй. "Энержи Ресурс" компанид ямар, ямар хууль үйлчилдэггүй гэдгийг бид мэдэх эрхтэй.
Би "Энержи Ресурс" компани өөрсдөдөө зориулсан хууль батлуулаад хулгай хийсэн гэж бодож байна. Хууль батлуул хулгай хийдэг. УИХ-ын гишүүдийг олноор нь санхүүжүүлдэг. Нэг хэсэг Монголын Засгийн газар Централ тауэрт хуралддаг байсан. Одоо ч хэвэрээ гэж бодож байна. Тиймээс энэ бүгдийг таслан зогсоох ёстой" гэлээ.
Үргэлжлүүлж унших
