Бараг 20 шахам жил үргэлжилсэн өргөн, нарийн царигийн маргаанд өнөөдөр дуусгавар болно. Ерөнхий сайд Л.Оюун-Эрдэнэ, БНХАУ-ын Төрийн зөвлөлийн Ерөнхий сайд Ли Чян нар өнөөдөр Харбин хотноо уулзах бөгөөд Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрт талууд гарын үсэг зурна. Засгийн газраас зарласан боомтын сэргэлтийн бодлого нэг алхам урагшилж, Монгол Улс хоёр дахь Замын-Үүд буюу Гашуун сухайт-Ганц мод боомт гэсэн экспортын төмөр замын шинэ гарцтай болох олон жилийн яриа хэлэлцээ албажна.
Засгийн газраас хэрэгжүүлэхээр зарласан 14 мега төслийн нэг болох Гашуунсухайт-Ганцмод чиглэлийн төмөр замын хил холболтын хэлэлцээр байгуулахаар УИХ-д холбогдох хуулийн төслийг өргөн барьсан. УИХ-аас тодорхой хүрээнд хэлэлцээр хийх эрхийг Засгийн газарт өгснөөр Уул уурхай, хүнд үйлдвэрийн сайд, Зам, тээврийн хөгжлийн сайд Б.Дэлгэрсайхан нар хэлэлцээрт гарын үсэг зурна. Нүүрсний экспортыг нэмэгдүүлэх төмөр замын гарцтай болсноор нэг хүнд ногдох ДНБ-ий хэмжээг 10 мянган ам.долларт хүргэх боломж бодитоор бүрдэх учиртай. Экспортод гарц, монголёуудад орлого нэмэх учраас Ерөнхий сайд Л.Оюун-Эрдэнийн БНХАУ-д хийж буй энэ удаагийн ажлын айлчлалыг ТҮҮХЭН хэмээн талууд нэгэн дуугаар мэдээлж байна.
Хил дамнасан төмөр замын бүтээн байгуулалтыг нэг компаниар хийлгэх үү, сонгон шалгаруулалт зарлах уу гэдгийг урд хөрштэй ярьж шийднэ. Экспортын төмөр замын санхүүжилтийг "Эрдэнэс Тавантолгой" ХК бэлнээр төлөхөөр тооцжээ.. Өмнө нь төлбөрөө Тавантолгойн нүүрсээр дүйцүүлэн төлөх олон жилийн гэрээ хийсэн, үнийн хувьд Монгол Улс алдагдал хүлээсэн зэрэг шүүмжлэл багагүй өрнөсөн. Харин энэ удаад нүүрсээр бартер хийхгүй гэж албаныхан мэдэгдсэн. Төр, засгийн удирдлагууд гадаадад айлчлахаараа ёс юм шиг өр, зээл тавьчихаад ирдэг жишгийг Ерөнхий сайдын энэ удаагийн айлчлал халж байгаагаараа онцлогтой. Ковидоос хойш сэргэж буй Монголын эдийн засагт дахин нэг эерэг давлагаа үүсэх нь гарцаагүй.
