Мэргэжлийн сүмогийн 74 дэх ёкозүнагаар Хошорюү С.Бямбасүрэн тодорлоо. Сүмогийн холбооны саналаар Ёкозүнагийн зөвлөл хуралдаж, есөн гишүүн дуу нэгтэйгээр түүнийг дэмжсэн байна. Ийнхүү өнөөдөр албан ёсоор Хошорюү С.Бямбасүрэнг мэргэжлийн сүмогийн 74 дэх ёкозүна болсоныг зарлав. Монголоос сүмогийн зургаа дахь их аварга төрсөн нь энэ.
Өдгөө 25 настай Хошорюү С.Бямбасүрэн ярихдаа "Би ёкозүна цолыг сэвтээхгүйн тулд тууштай зүтгэх болно. Сүмогийн ертөнцөд хөл тавьснаас хойш энэ миний мөрөөдөл байсан. Энэ аз жаргалтай мэдрэмжийг илэрхийлэх үг алга. Би өөрийгөө улам дайчлах болно. Юу ч болсон хүчтэй байх болно" гэжээ.
Мэргэжлийн сүмод 42 башё барилдаж, ёкозүна болсон Хошорюүгийн энэ амжилт түүхэнд зургаадугаарт орох үзүүлэлт ажээ. Өөрөөр хэлбэл, ийм богино хугацаанд ёкозүна цол хүртсэн зургаа дахь бөх болжээ. Эзэн хааны цомыг хоёр удаа хүртсэн Хошорюү С.Бямбасүрэн ирэх гуравдугаар сарын башёд ёкозүна цолтой зодоглоно.
