Гашуунсухайт Ганцмод боомтын хил дамнасан төмөр замын холболтын ажлыг эхлүүлэх талаар Засгийн газраас УИХ-д өргөн барих тогтоолын төслийн талаар УУХҮ-ийн сайд Ц.Туваан танилцуулав. Тэрбээр “Монгол Улсын Засгийн газар БНХАУ-ын Засгийн газар хооронд Гашуунсухайт Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай” УИХ-ын тогтоолын төслийг Засгийн газраас УИХ-д өргөн барилаа. Боомтын бүтээн байгуулалтын ажил нэлээн хугацаа алдаж сунжирсан. Үүнийг шийдвэрлэхийн тулд хоёр улсын Засгийн газар хооронд хэлэлцээр байгуулах шийдвэр гарч, УИХ-аас чиглэл авах тухай тогтоолыг яаралтайгаар өргөн барьж байна.
Тогтоол батлагдсаны дараа хоёр улсын хамтарсан хэлэлцээр хийж, УИХ-аар батална. Хоёр улсын талаас ажлын хэсэг байгуулаад ажиллаж байна. Ажлын хэсгүүд 60 орчим удаа хамтран хуралдсан байна. УИХ-ын тогтоол батлагдсаны дараа “Эрдэнэс Тавантолгой” компани “Чайна Энержи” компани гурвалсан гэрээ байгуулна. 2003 оноос анх яригдаад 2009 онд хоёр улсын Засгийн газар хоорондын уулзалтаар хэлэлцээр байгуулсан гээд багагүй цаг хугацаанд яригдсан төсөл.
Гашуунсухайт боомтыг холбосны дараа дараагийн боомтууд холбогдох нөхцөл бүрдэнэ. Боомтууд холбогдсоноор нүүрсний экспорт ойролцоогоор 40 сая тонноор нэмэгдэнэ. Алдагдсан боломжийг багцаагаар 4-5 тэрбум ам.доллар гэж тооцсон байдаг. УИХ-ын тогтоол бол хэлэлцээр хийхэд ямар асуудлуудыг тавих тухай чиглэл авах юм. Тогтоол баталсны дараа хоёр улсын Засгийн газрын хэлэлцээр хийж, УИХ-аар батална. Араас нь, Төмөр замын холболт, Нүүрс худалдах, худалдан авах урт хугацааны болон Уурхайн хүчин чадлыг нэмэгдүүлэх гэсэн гурван гэрээ “Эрдэнэс Тавантолгой” компани “Чайна Энержи” компанитай зурах юм.
