Шивээхүрэнгийн гаалийн газрын дарга Өнөрбуян, Зөрчил хариуцсан ахлах байцаагч Батцоож нар Шивээхүрэнгийн гаалийн ажилтнуудын хаягийг Өмнөговь аймгийн харьяалалтай болгон шилжүүлж, орон нутгийн сонгуульд санал өгүүлэх замаар улс төрийн ажилд оролцсон тухай өмнө нь мэдээлсэн. Гаалийн хурган дарга төрд биш улс төрийн намд зүтгэж, шинэ ажилтнуудаа дарамталж улс төрийн ажилд оролцуулах хориотой. Гаалийн байгууллага бол улс төрийн аливаа ажилд оролцохыг хуулиар хатуу хориглосон, төрийн тусгай алба юм. Ингэж улстөржиж явахдаа 8679 УБГ улсын дугаартай жийп машинаар осол гаргасан байдаг.
Осол болоход машин дотор нь гаалийн 5 ажилтан зорчиж явсан бөгөөд их, бага хэмжээгээр гэмтсэн тухай орон нутгийн эх сурвалж мэдээлж байгаа юм. Хуулийг илтэд зөрчсөн үйл явдал болсноос хойш 20 гаруй хоэож байхад Шивээхүрэн дэх Гаалийн газрын дарга Өнөрбуянд хариуцлага тооцох нь бүү хэл ослыг, сонгуульд оролцож улстөржсөн үйлдлийг ихэд нууцалж, бодит үйл явдлыг нуугаад өнгөрөөхөөр шийдсэн бололтой. Угтаа бол Гаалийн ерөнхий газрын дотоод хяналтынхан шалгалт оруулж, буруутанд хариуцлага хүлээлгэх учиртай.
Шивээхүрэнгийн гаалийн газрын дарга Өнөрбуянгийн хуул зөрчсөн энэ үйлдэлд хариуцлага хүлээлгэхгүй бол дээд удирдлагууд нь гэмт хэргийг нуун дарагдуулсан хамсаатнаар татагдан шалгагдах ёстой. Ерөөс гаальд шургалсан цагдаа угшилтай шахааны албан тушаалтнууд иймэрхүү хуйвалдааныг өлхөн зохион байгуулж, гэм буруутай үйлдлээ хаацайлаад сурчихсан гэдгийг олон хүн хэлдэг. Сангийн яам, Гаалийн ерөнхий газар илтэд хууль зөрчсөн энэ үйлдэлд нүдэн балай, чихэн дүлий хандаж байгааг юу гэж ойлгох вэ. Амьдралд алдаж эндсэн залуусаар шоронгоо дүүргэчихээд хууль зөрчсөн цүнх баригч, шахааны хурган дарга нарын толгойг илсээр байх уу.
