Дотоодынхоо нийт эрчим хүчний хэрэглээний 60 гаруй хувийг дангаараа хангадаг Багануурын уурхайн хүчин чадлыг нэмэгдүүлж, санхүүгийн чадавхийг нь сайжруулах цаг нэгэнт иржээ. Үүнд анхаарахгүй бол Багануурын уурхай яах вэ гэхэд ард иргэд чинь өвлийн хүйтэнд цахилгаан ч үгүй, дулаан ч үгүй болох аюул бодитой нүүрлэж байна.
Монголын сошиал орчинд олон дагагчтай, нийгмийн идэвхитэй гишүүдээс бүрдсэн 20К клубийн хамт олон өнгөрсөн долоо хоногт Багануурын уурхайг зорьж, уурхайн үйл ажиллагаатай танилцлаа. 20к клубийнхэн #BrandTrend20K хэмээх аян зохион байгуулаад нэлээд хугацаа өнгөрсөн. Энэ удаад БагануурХК-ийн зогсох эрхгүй эгэл баатруудын ажил хөдөлмөртэй танилцлаа. Тэднээс шалтгаалах юм алга. Харин бодлогын дэмжлэг зайлшгүй шаардлагатай байгаа нь тулгамдсан асуудал болжээ.
Санхүүгийн хувьд алдагдалтай байгаа ч тэд үйлдвэрлэлтийн төлөвлөгөөт зорилтоо 100-аас дээш хувь биелүүлсэн байна лээ. Сэтгэлтэй зүтгэлтэй ийм хамт олныг нэг л дэмжээд өгчихвөл сэпхийгээд л босоод явчихна даа гэж өөрийн эрхгүй бодогдсон. Уг нь Багануурын уурхайн өнгө зүс, ажилчдын уйгагүй хөдөлмөр, удирдлагын арга барил, хичээл зүтгэл ер дутаагүй юм билээ.
Багануур ХК нийгмийн хариуцлагын стратеги боловсруулан хэрэгжүүлсэн, уул уурхайн анхдагч компаниудын нэг юм. Түүнчлэн Монгол улсад нөхөн сэргээлт хийсэн анхдагч уурхайнуудын нэг. ЭКО уурхай. 2022 оноос хойш нийт 21637 ширхэг 2-3 настай суулгацыг хамгаалалтын зурвас, голын нөхөн сэргээлтэд тарьж, хашиж хамгаалан арчилж байна. 2023 онд дэд бүтэц бүхий 5 га талбайд мод үржүүлгийн газар байгуулж, 400 мянга орчим улиас, бургас, шинэс, хайлаас, гүйлс, голт бор, шар хуайс модны тарьц суулгацыг модлог мөчрөөр болон үрээр бойжуулж байна. Хустайн байгалийн цогцолборт газраас 40 ш Монгол тарвага авчирч компанийнхаа эдэлбэр талбайд нутагшуулах ажлыг 2024 оноос эхлүүлжээ. Тарвагыг хээрийн инженер гэдэг. Нөхөн сэргээлтэд нөлөөтэй ажил болжээ.
Нүүрсний үнийг төр хатуу барьж зах зээлийн үл үзэгдэх механизмыг хүчээр өөрчлөх гэсээр өнөөдрийг хүрсэн. Түүний үр дүнд өнөөдөр улсаараа эрчим хүчгүй болоход ойрхон байна. Нүүрсний үнэ нэмэх асуудал нь зөвхөн “Багануур” ХК, уурхайн сайн сайхны төлөө асуудал биш юм. Дүүрэг орон нутаг, Эрчим хүчний салбар, Үндэсний аюулгүй байдал, цаашдлаад Монгол Улсын Хөгжилд асар чухал ач холбогдолтой. Багануур яаж ажиллахаас нийслэлийнхний амьдрал шийдэгдэнэ гээд хэлчихэд буруутахгүй байх. Энэ удаа тус уурхайн үйл ажиллагаа руу олон нийт, төр засгийн анхаарлыг хандуулах нь зайлшгүй байжээ.
М.Содоо
