Улс төрийн намын тухай хуулийг 2023 онд шинэчлэн найруулж, УИХ-аас баталсан. Хуулийн 27 дугаар зүйлийн 27.3-д "Нийт сонгогчдын нэг ба түүнээс дээш хувийн санал авсан намд төрөөс санхүүжилт олгоно" гэж заасан байдаг. Энэ санхүүжилтийг одоогийн парламентад суудалтай МАН, АН, ХҮН нам, Үндэсний эвсэл, Иргэний зориг ногоон нам авахаас гадна огт суудал аваагүй ч 40-69 мянган сонгогчийн санал авсан Шинэ нэгдсэн эвсэл, Үнэн ба зөв намд олгох хуулийн боломж бүрдсэн гэж Сонгуулийн ерөнхий хороо үзэж байгаа юм байна.
УИХ-ын 2024 оны сонгуулийн дараах жилд буюу 2025 оноос МАН төрөөс 2.8 тэрбум, АН 2.1 тэрбум, ХҮН 993 сая, Үндэсний эвсэл 446 сая, Иргэний зориг ногоон нам 455 сая, Шинэ нэгдсэн эвсэл 312 сая, Үнэн ба зөв нам 250 сая төгрөг гээд нийт 7.4 тэрбум төгрөгийг санхүүжилт болгон өгөхөөр санал боловсруулжээ. 2024 оны УИХ-ын сонгуулийн явцын зардлын тайлангаар улс төрийн нам, нэр дэвшигчид нийт 87.5 тэрбум төгрөгийн орлогоос 66.6 тэрбумыг нь зарцуулжээ. Тодруулбал, 747 нэр дэвшигч 76 тэрбумаас 58 тэрбумыг нь, 14 нам, эвсэл 11 тэрбумаас 8.5 тэрбум төгрөгийг зарцуулсан байна.
