Монгол бөхийн ерөнхий шинж нь адилавтар боловч барилдах арга барил, хэлбэр маяг нь нутаг нутагт өөр өөрийн өвөрмөц онцлогтой байдаг. Тухайлбал унасан бөхийн хоёр мөр буюу зоо талыг нь газарт тулгавал сая ойчсоноор тооцдог нь монгол бөхийн баруун урсгал салбар болдог. Харин унасан бөхийн аль нэг эрхтэн нь урьдаар газарт тулбал ойчсоноор тооцдог хэлбэрийн бөхийг монгол бөхийн зүүн урсгал гэдэг. Үзэмчин бөх монгол бөхийн язгуур хэлбэрээс уламжилж ирсэн эл зүүн урсгал салбарт хамаарах бөгөөд барилдах ёс, өмсгөл, дэвээ магшааны хувьд хувьд ихээхэн өвөрмөц шинжтэй билээ. Үзэмчин бөхийн барилдах ёс нь хоёр бөх зөвхөн зодогноос барилцана. Бүсэлхийнээс доош барьж мэх хийвэл унасанд тооцдог байна.
БНХАУ-ын ӨМӨЗО-ы Үзэмчиний хошуу, овооны наадамд энэ жил 128 бөх барилдаж, чөлөөт бөхийн улсын аварга Б.Цэнгэлбаяр түрүүлжээ.
