ИРГЭД, ЖОЛООЧ ТЭЭВЭРЧДИЙН АНХААРАЛД!
А1101 дугаартай Мөрөн-Хатгал чиглэлийн авто замд 2024.07.20-ны өдрийн үeрээр Мөрөн хот талаас 14 дахь км-т байрлах Хужиртын амны төмөрбетон гүүрийн хайс, хашлага усанд угаагдаж унасан гэмтэл гарчээ. Тодруулбал, Мөрөн-Хатгал чиглэлийн авто замын 19-өөс 20км-т 2 цэгт, 43-аас 45км-т 3 цэгт нийт 5 цэгт үeр бууж хөвөө, далан болон замын зорчих хэсэгт эвдрэл үүссэн.
Одоогоор тус гүүрээр тээврийн хэрэгслийн хөдөлгөөнийг хэвийн нэвтрүүлж байгаа бөгөөд бусад гүүрнүүдийн ашиглалт хэвийн байгаа юм байна.
А1101 дугаартай Мөрөн-Хатгал чиглэлийн авто замд нийт 6 гүүр, 87 ус зайлуулах хоолой байдаг ажээ.
Тухайн авто замыг хариуцагч "Хөвсгөл зам" ХХК газар дээр нь шуурхай ажиллаж зам дээр тогтсон лаг шавар, чулууг цэвэрлэсэн. Ирэх өдрүүдэд замын байгууламжийг сэргээн засварлах ажлыг шуурхай эхлүүлэхээр төлөвлөж байна.
Одоогоор тухайн эвдрэл үүссэн цэгүүдэд анхааруулах тэмдэг байрлуулсан бөгөөд иргэд, жолооч тээвэрчид та бүхэн тухайн хэсгээр анхаарал болгоомжтой зорчино уу гэж Зам тээврийн хөгжлийн төвөөс мэдээллээ
