Нүүрс тээврийн чиглэлээр Өмнөговь аймагт үйл ажиллагаа явуулдаг “Эко Глобал Ложистикс” компани өөрийн охин компаниудтайгаа хамтран Цогтцэций сумын Соёлын төвийн гадна талбайг тохижуулж, хүлээлгэн өглөө. Цогтцэций суманд үйл ажиллагаа явуулдаг тус компани нийгмийн хариуцлагын хүрээнд орон нутгийн хөгжил, иргэдэд чиглэсэн олон ажил хийж байгаагийн нэг нь энэхүү бүтээн байгуулалт юм.
Энэ тухай Цогтцэций сумын Засаг дарга Г.Бацмаа “Сумынхаа 100 жилийн ойг угтаад 100 бүтээлч ажил хийнэ. Иргэдийн хүсэл, саналыг “Эко глобал ложистикс” компани хүлээн авч Соёлын төвийн гаднах 700 ам метр талбайг 80 сая төгрөгөөр тохижуулж өглөө” гэв.
“И-Коммодитс Монголиа интеллижент ложистикс” ХХК-ийн дэд захирал Ш.Нэргүй “Соёлын үрийг тарьдаг, хүүхэд залуууст үүд хаалга нь үргэлж нээлттэй байдаг Соёлын төвийн гадна орчныг сайжруулах хүндтэй үүргийг хүлээж ажилласандаа баяртай байна. Бид орон нутгийн иргэд, малчид, сумын удирдлагуудтай олон бүтээлч санал санаачилга дээр хамтарч ажилладаг. Өнгөрсөн өвөл цаг хатуу болсон. Цогтцэций суманд өвөлжилт хүндэрч, мал малчин хоёр өвсгүй зутрахад Сүхбаатар аймгийн Эрдэнэцагаан сумаас бид өвс тээвэрлэн авчирч, малчдаа зудын болзошгүй эрсдлээс хамгаалж тусалсан. Манай хамт олон сум орон нутагтаа хувийн хэвшлийн аж ахуйн нэгжүүдийг нийгмийн хариуцлагад уриалж, орон нутгаа бодитоор дэмжих, хөгжил цэцэглэлтэд манлайлж оролцохыг ямагт эрхэмлэдэг хамт олон” гэлээ. 
