АН-ын удирдлагууд цаг үеийн асуудлаар мэдээлэл хийлээ. АН-аас өнгөрсөн бямба гаригт 2024 оны УИХ-ын сонгуульд нэр дэвшигчдээ тодруулсан тогтоолоо Сонгуулийн ерөнхий хороонд хүргүүлсэн. Гэвч АН-аас гурван өөр тогтоол хүргүүлсэн асуудал үүсээд байгаа юм. СЕХ-ны зүгээс Ардчилсан намаас ирүүлсэн 32-р тогтоолыг хүчинтэй гэж үзэж байгаагаа мэдээлсэн. АН-ын дарга Л.Гантөмөр тавдугаар сарын 20-нд нэр дэвшигчдийг тодруулснаас хойш таг чимээгүй, мэдээлэл өгөхөөс татгалзаж ирсэн. Тэгвэл өнөөдрийн хуралд Л.Гантөмөр өөрөө оролцож, тайлбар мэдээлэл өглөө.
Ардчилсан намын дарга Л.Гантөмөр: АН УИХ-ын ардчилсан 9 дэх удаагийн сонгуульд оролцоход бэлэн байгаа. АН сонгуульд оролцох бүртгэл, нэр дэвшилтээ хуулийн хугацаанд өгсөн. Тавдугаар сарын 20-нд УИХ-ын сонгуульд оролцох нэр дэвшигчдээ тодруулсан. АН сонгуульд нэр дэвшүүлсэн 126 хүнийг эхлээд намын гишүүд, дараа нь аймаг, дүүрэг, нийслэлийн намын гишүүдээс асуусан. Дараа нь сонгон шалгаруулах хороон дээрээ ярилцсан. Тойрогт нэр дэвшүүлсэн хүмүүсийг сонгохдоо 5 удаа судалгаа явуулж, ард түмний итгэлийг хүлээх хэмжээний хүмүүс гэж сонгосон. Тухайлбал,
-Ялагдаагүй Ерөнхийлөгч гэдэг утгаар нь Х.Баттулгыг дэвшүүлсэн.
-Хууль засаглах үүднээс хуульчдыг нэр дэвшүүлсэн.
-Хэлмэгдсэн Ерөнхий сайд гэдгээр нь Н.Алтанхуягийг нэр дэвшүүлсэн
-Нэр цэвэр залуучуудыг дэмжиж, хууччуулаа хойш тавьсан.
Манай 126 нэр дэвшигчийн 102 нь цоо шинэ, УИХ-ын түвшинд ажиллаж байсан 20 орчим, Засгийн газрын түвшинд ажилласан 10 гаруй хүн бий.
Жагсаалтад салбар, салбарын төлөөлөл орсон. Жагсаалтад улс төрийн туршлагатай 4-5 хүн л орсон. Нийгэм, эдийн засагт үүсэн асуудлыг шийдвэрлэх чадвартай салбарын төлөөллүүдийг сонгосон.
Тавдугаар сарын 25-нд намын даргын гарын үсэгтэй тогтоолыг СЕХ-нд хүргүүлсэн. Одоо СЕХ дээр 126 нэр дэвшигчийн бүртгэл хянагдаад явж байгааг хэлье. АН сонгуульд оролцох батламжаа авсан. АН-ын явуулсан тогтоол, нэр дэвшилт хэвээрээ байгаа гэдгийг хэлье.
Энэ удаагийн сонгууль АН-ын сонгууль биш. Энэ удаагийн сонгууль бол Монголын ардчиллыг байлгах уу, үгүй юү гэдгийг шийдэх сонгууль юм. Би Ардчилсан намыг ялуулах зорилготой сонгуульд оролцож байгааг хэлье.
Дараа нь сэтгүүлчдийн асуултад хариуллаа.
-Л.Гантөмөр дарга аа, та яагаад жагсаалтын нэгд орсон бэ. Жагсаалтад орсон хүмүүсийг ямар шалгуураар сонгосон бэ?
-АН-ын дарга Л.Гантөмөр: Сонгууль бол өөрөө шийдэл. Хэн намаа ахалж, ялалт байгуулах вэ гэдгийг 100 хувь илэрхийлж байгаа юм. Энэ бол шоу биш. Ж.Батсуурь гишүүн жагсаалтад орсон. Энэ хүн намаа төлөөлж хөдөө явах ёстой. Жагсаалтад орсон хүмүүс нэгд, өөрсдөө ардчиллыг төлөөлөх учиртай. Хоёрт, асуудал шийдэх чадах хүмүүс байх. Гуравт, нийгмийн төлөөлөл багтах ёстой. Жагсаалтад орсон 48 хүний тав нь УИХ-ын гишүүн, Засгийн газрын гишүүн байсан хүмүүс байгаа. Бид жагсаалтын ард нуугдахыг хүсээгүй.
Залуу хүний тухай ярьж байна. Залуусыг жагсаалтын хамгийн эхэнд тавихыг намын залуус өөрсдөө хүсэж байна. Залуусыг дээш нь гаргахгүй бол улс төрөөс холдох гээд байна. Залуус улс төрөөс холдохоор улс орон мөхөөд байна. Залуусыг итгэл үнэмшилтэйгээр гаргаж ирэхгүй бол Ардчилсан намын дараа үе тасарна. Тиймээс зарим залуусыг жагсаалтын дээгүүр тавьсан.
АН-ын гишүүн, УИХ-ын гишүүн Б.Пүрэвдорж өнгөрсөн тавдугаар сарын 20-нд болсон ҮБХ-ны хурал дээр санал хураалгаж, жагсаалтын 9-д эрэмбэлсэн С.Баярцогтыг унагаж, оронд Х.Тэмүүжинг оруулсан гэж мэдээллээ. Өөрөөр хэлбэл, АН-ын дарга Лу.Гантөмөрийн оруулж ирсэн жагсаалтын 9-т С.Баярцогт байсныг ҮБХ-ны хурал дээр дахин санал хураалгаж Х.Тэмүүжингээр сольсон гэж АН-ын удирдлагууд хэвлэлийн хурлын үеэр албан ёсоор мэдэгдлээ.
