Өмгөөлөгч Г.Батбаяр энэ сарын 26-нд Богдхан амралтын газрын зогсоолд бууны шархтайгаар амиа хлдсан. Энэ хэргийн талаар ЦЕГ-аас мэдээлэл өглөө. Олон нийтийн сүлжээгээр задлан шинжилгээг ар гэрт мэдэгдэлгүй яаравчлан хийсэн тухай мэдээлэл гарсан. Тэгвэл ЦЕГ-аас тайлбарласнаар Шүүх шинжилгээний тухай хуульд зааснаар цогцос шинж чанараа алдах, ул мөр устаж алга болохоор байвал задлан шинжилгээг даруй буюу боломжит хугацаанд хийнэ гэж заасан байдаг ажээ. Энэ дагуу хуулийн хүрээнд задлан шинжилгээг явуулсан. Шүүх шинжилгээний бүрэлдэхүүнийг хохирогчийн талд танилцуулсан Хохирогчийн талаас энэ үед ямар нэгэн хүсэлт гаргаагүй. Задлан шинжилгээ хийхдээ хохирогчийн талаас зөвшөөрөл авах ёстой талаар хуулийн заалт байдаггүй. Бүх зүйл хуулийн дагуу явсан гэж мэдээллээ.
Буу амь хохирогчийн эзэмшлийнх байсан, өөрөө худалдаж авсан нь тогтоогдсон байна.
Мөн өмгөөлөгч Батбаяр болон болон сэтгүүлч Баярмаа нар бусдын нэр хүндэд халдсан, илт худал мэдээллийг олон нийтэд цацсан хэргээр Мөрдөн байцаах албанд шалгагдаж байжээ. Тэдний хэргийг шүүхэд шилжүүлэх саналтайгаар прокурорын газарт шилжүүлсэн байжээ.
Амь хохирогчийн маршрут, сэтгэл санааны байдал гэх мэт нөхцөл байдлыг тогтоохоор хэд хэдэн хүнийг гэрчээр дуудаж байцаасан. Хэн хэнийг дуудаж байцаасан талаар мөрдөн байцаалт явж буй учир дэлгэрэнгүй мэдээлэл өгөх боломжгүй гэж цагдаагаас мэдээллээ. Цогцос солигдсон гэх мэдээлэл хэвлэл мэдээллээр гарсан Энэ бол худал мэдээлэл гэв.
