Энэ сарын 15-нд Дархан-2 өртөө-Шарын гол хоорондын замын 11км-ын 5 зуутад байрлах авто замын гарамд 21:11 цагт 3501-р галт тэрэгний урдуур Субару маркын улаан өнгийн суудлын 99-47 ОР…. автомашин орж осолдсон харамсалтай хэрэг гарсан. Уг автомашинд нэг гэр бүлийн эхнэр, нөхөр, хоёр хүүхдийн хамт зорчиж явсан бөгөөд ослын улмаас 40 настай бүсгүй тархиндаа хүнд гэмтэл авч нас барсан билээ. Хүүхдүүд арын суудалд сууж явсан учир харьцангуй хөнгөн гэмтсэн ба жолооч залуу эмнэлэгт бэртлийн улмаас эмчлүүлж байгаа юм.
Уг гэр бүл Эрдэнэт хотод амьдардаг бөгөөд нийслэл орж ажил амжуулчихаад буцаж явахдаа ийн осолд оржээ. Бүсгүйн нас барсан өдөр буюу ослын маргааш өдөр нь бүсгүйн төрсөн өдөр нь байжээ. Талийгаач төрсөн өдрөө тэмдэглэхээр төлөвлөж найзууддаа урилга илгээгээд байсан ч ийнхүү амжилгүй бурхан зүг оджээ.
Уг машин зогсож байсан автомашинуудын урдуур тойрон гарч галт тэргэнд мөргүүлсэн, энэ үед гармын дохионууд авто машины хөдөлгөөнд хориглосон заалттай, зарлан мэдээлэх төхөөрөмж мэдэгдэх хонх, чиглэл заагч хэвийн ажилтай, гармын жижүүр зам дээр дохиотой зогсож байсан гэж албаны мэдээлэлд дурдсан. Арын суудалд сууж явсан хүүхдүүд аав утсаа оролдож яваад осол гаргасан гэсэн мэдээллийг өгсөн байна.
