2020 оны 6-р сарын 25 -нд шавыг нь тавьж байсан Боршоо боомт өнөөдөр нээлтээ хийлээ. Боомтын шинэчлэлийн хүрээнд 21 обьект шинээр барьж, авто зам, инженерийн шугам, сүлжээг бүрэн шинэчлэжээ. Мөн сүүлийн үеийн хилийн хяналтын тоног төхөөрөмж суурилуулж олон улсын шаардлагыг бүрэн хангасан боомтыг нээж байгаа нь энэ юм.
Уг боомтыг нээснээр өдөрт нэвтрэх зорчигчийн тоо 5 дахин, ачааны автомашины тоо 3 дахин, суудлын тээврийн хэрэгслийн тоо 7 дахин нэмэгдэх боломжтой боллоо.
Энэхүү бүтээн байгуулалт нь улс орон, бүс нутаг, аймгийн худалдааг идэвхижүүлж, иргэдийн орлогыг нэмэгдүүлэх нөхцөлийг бүрдүүлэх юм. Засгийн газраас Ховд-Улаангом чиглэлийн 163.3 км авто замын бүтээн байгуулалтын ажлыг энэ онд эхлүүлэх гэж байна. Тус авто зам нь ашиглалтад орсноор баруун босоо эдийн засгийн коридороор БНХАУ-ын баруун бүсийн төв Өрөмч хот болон ОХУ-ын эдийн засгийн Баруун Сибирийн төв Кызыл, Красноярск хотуудыг холбосон бараа, үйлчилгээ, тээвэр логистик, аялал жуулчлалын томоохон бүс нутаг болон хөгжих ач холбогдолтой юм. Баруун бүсийн аймгуудын хөгжил дэвшилд чухал үүрэгтэй гэж үзэж байгаа Боршоо боомтын өргөтгөлийг Азийн хөгжлийн банкны санхүүжилтээр босгожээ.
