Хөгжлийн боомилогч хүчин зүйлийг богино хугацаанд шийдвэрлэж, чадвал Монгол Улс нэг хүнд ногдох ДНБ-г өсгөж, ядуурлыг тав дахин бууруулж, чинээлэг дундаж давхаргыг 80 хувьд хүргэх зорилт бүрэн хэрэгжих үндэстэй. МАН нь социал демократ үзэл баримтлалтай намын хувьд хүний хөгжил эрүүл мэнд боловсрол, шинжлэх ухааны салбарыг онцгойлон төрийн бодлогоор дэмжих болно. Төрийн үйлчилгээний хүртээмж, цалин тэтгэвэр амьдралын чанар суурь үзүүлэлтийг Скандинавын улс орнуудад нийцүүлэн хэрэгжүүлнэ. Иргэн бүхэн жил бүр эрүүл мэндийн оношилгоонд үнэгүй хамрагдаж олон улсын чанарт нийцсэн эрүүл мэндийн үйлчилгээг эх орондоо авдаг суурь нөхцөлийг бүрдүүлнэ. Та бидний дэвшүүлж буй шинэ сэргэлтийн бодлого нь "Алсын хараа-2050" урт хугацааны хөгжлийн бодлогыг эхний арван жилд зайлшгүй шийдвэрлэх шаардлагатай, хөгжлийн боомилж буй хязгаарлаж буй хүчин зүйлийг цаг алдалгүй шийдвэрлэж, цар тахлын эдийн засгийг сэргээх зорилтот хөтөлбөр юм.
Монголын ирээдүйн иргэнийг бэлтгэх цогц шинэчлэлийг хийх болно. Монгол бол залуучуудын орон юм. Залуус зорилготой, хуримтлалтай, өөрийн гэсэн орон сууцтай, байхад чиглэсэн дундаж давхаргыг дэмжсэн үндэсний шинэ тогтолцоог хамтдаа бүрдүүлнэ. Залуусын амьдралын баталгаа бол МАН-ын баталгаа билээ. Их хурлын төлөөлөгчөөр шинэ залуус сонгогдсон байна. Нийт залуустаа амжилт хүсье.
21-р зуун бол хурдны зуун юм. Хурдыг бүтээмж, бүтээмжийг амжилт дагадаг. Аж үйлдвэрийн дөвөрдүгээр хувьсгал, хиймэл оюун ухаан блокчейн зэрэг технологийн хөгжлийн эрин үед бид дэлхийн дэвшилтэт технологийг угтаж шинжлэх ухраан техник технологийн салбарыг хөгжүүлж, хөрвөх чадвараа сайжруулах шаардлага байна. Шинжлэх ухаан эдийн засаг технологийн инженерүүдийг төрийн бодлогоор дэмжих болно. Өнөөдөр миний бие Монгол Улсын хөгжил чөдөр тушаа болсоор ирсэн асуудалд гарц шийдэл бүхий зургаан багц асуудлыг тоймлон бэлтгэлээ.
Нэг. Боомтын сэргэлт. Монгол Улс далайд гарцгүй орны хувьд боомтуудыг төмөр зам, авто зам, хурдны замаар цаг алдалгүй холбож агаарын тээврийн салбарыг цоо шинэ шатанд гаргах зайлшгүй шаардлагатай байна. Монгол Улс далайд гарцгүй газар зүйн онцлогтой зэрэг асуудал хөгжилд саад болдгийг бид мэднэ. Манай улс нийт хуурай замын 42 боомт, агаарын замын дөрвөн боомт, ОХУ-тай 29, БНХАУ-тай 13 боомтоор хиллэдэг. Харамсалтай нь одоогийн байдлаар авто замаар долоо, төмөр замаар гуравхан боомт үйл ажиллагаа явуулж байна. Боомтын хүчин чадлаар бид дэлхийд 130-т эрэмбэлэгдэж байна. Засгийн газраас Гашуунсухайт чиглэлийн төмөр зам барих ажлыг ирэх онд багтаан ашиглалтад оруулна. Ханги, Бичигт, Шивээ-хүрэн боомтуудыг төмөр замаар холбох ажлыг цаг алдалгүй эхлүүлнэ. Ингэснээр 5600 км урттай, төмөр замын сүлжээ бий болж цаашид транзит улс болох суурь нөхцөл бүрдэх юм.
Өнөөдөр дэвшүүлж буй шинэ сэргэлтийн бодлогын хүрээнд Ханги, Цагаан дэл, Бургастай, Цагаан нуур, Тэс, Ханх, Бага илэнх, Зэлтгэр, Ульхан, Баянхошуу, Бичигт зэрэгт боомтыг авто замаар холбож бүс нутгийн эдийн засгийн өсөлтийг эрс сайжруулах томоохон зорилтуудыг дэвшүүлж байна. Хилийн боомтуудыг хурдны замаар холбох ажлыг Алтанбулаг, Замын-Үүд боомтоор холбосон 987 км хурдны зам барихаас эхлэх болно. Боомтуудын өрсөлдөх, чадвар нэвтрэх хурдыг эрс сайжруулж боомт түшиглэсэн шинэ хотуудыг байгуулцгаая. Шинэ нисэх онгоцны буудлыг Ази Европыг холбосон агаарын тээврийн дамжин өнгөрүүлэх төв болгон өргөжүүлж, агаарын тээврийн чөлөөт өрсөлдөөнийг идэвхжүүлж хүний болон агаарын карго тээврийн харилцан ашигтай түншлэн ажиллах, зорилт тавьцгаая.
Хоёрт. Эрчим хүчний сэргэлт. Эрчээ алдсан эрчим хүчний салбар Монгол Улсын хөгжлийг сааруулагч томоохон хүчин зүйлийн нэг боллоо. Бид газрын доорх ертөнц буюу дулаан цахилгаан эх үүсвэр түүнийг дагасан шугам сүлжээний асуудлыг шийдвэрлэхгүйгээр газрын дээрх бүтээн байгуулалтыг ярих боломжгүй. 1984 онд ДЦС-4 байгуулагдсанаас хойш эрчим хүчний нэг ч шинэ үүсвэрийг төрийн зүгээс байгуулж чадсангүй. Гэтэл өсөн нэмэгдэж буй эрчим хүчний хэрэглээ тав байтугай, зургаа дахь станцыг шаардаж байна. Монгол Улс эрчим хүчний импортод жил бүр дунджаар 400 гаруй тэрбум төгрөгийг зарлагадаж байна. Дулааны станцын насжилт 35-60 жил, дулаан дамжуулах төвийн насжилт 32-62 жилийн настай. Шинэ сэргэлтийн бодлогын хүрээнд зүүн хойд Азийн супер цахилгаан сүлжээнд холбогдож, хоёр улсыг холбосон өндөр хүчдэлийн агаарын шугамыг барьж байгуулах зорилтыг дэвшүүлж байна. Цөмийн болон устөрөгчийн эх үүсвэрийг барих төрийн бодлогоо цаг алдалгүй тодорхойлъё. Сэргээгдэх эрчим хүчний эх үүсвэр, усан цахилгаан станцыг нэн тэргүүний зорилт болгож, Эрдэнбүрэнгийн УЦС-ын бүтээн байгуулалтыг дуусгаж, Эгийн голын УЦС-ыг эхлүүлэхийн төлөө бүхий л нөөц боломжоо дайчлан ажиллая.
Цахилгаан эрчим хүчний шинэ эх үүсвэр, шинэ байгуулагдах Цахим хөгжлийн яам болон БШУЯ илүүтэй анхаарах шаардлагатай. ОХУ-аас БНХАУ руу Монгол Улсын газар нутгаар дамжуулах байгалийн хийн хоолой барих бүтээн байгуулалтын ажлаа эрчимжүүлье. Энэ бүтээн байгуулалт Монголын эдийн засгийн хөгжилд нөлөөлж, эрчим хүчний хэрэглээнд цоо шинэ дэвшил авчирсан шинэ хуудсыг нээж чадна. "Таван толгой", Амгалангийн цахилгаан станцыг сэргээх нь эрчим хүчний бүтээн байгуулалтаа сэргээхэд чухал ач холбогдолтой хэмээн үзэж байна.
Гуравт. Аж үйлдвэрийн сэргэлт. Аль ч улсын эдийн засгийн хөгжил аж үйлдвэрлэлт байдаг билээ. Хийж чадахгүй зүйлсээ суралцахаас илүүтэй, хийж чаддаг байсан зүйлээ сэргээх нь оновчтой юм. Монгол Улс байгалийн баялгийн 90 хувийг боловсруулаагүйгээр нэмүү өртөг шингээлгүй, хямд үнээр гаргаж байна. Гэтэл дотоодын бүтээгдэхүүний 90 хувийг импортоор авч байгаа нь аж үйлдвэржилтийн бодлогоо алдсаны гашуун сургамж билээ. Монгол Улс зэсээ баяжуулж нүүрсээ угааж, алтаа цэвэршүүлж, дотоодын хүнсний хэрэглээгээ хангах түүхий эд нийлүүлэгч улсаас аж үйлдвэржсэн улс болгох бие даасан байдлаа хангах зайлшгүй шаардлага байна. Ган болон зэс боловсруулах үйлдвэр, аж үйлдвэрийн суурь цөм юм. Эрдэнэтийн зэс баяжуулах үйлдвэр, Дархан Сэлэнгэд гангийн үйлдвэр барьж ашиглалтад оруулна. Нефтийн үйлдвэрээ 2025 онд багтаан ашиглалтад оруулахын төлөө хамтдаа хичээе.
Дөрөвт. Хот хөдөөгийн эсрэг. Нийслэл Улаанбаатар хотод нийт хүн амын 50 гаруй хувь нь амьдарч, их дээд сургуулийн 90 орчим хувь, худалдаа үйлчилгээний 88 хувь, бүртгэлтэй аж ахуй нэгжүүдийн 76 хувь, Улаанбаатар хотод төвлөрч ДНБ-ий 65 хувийг нийслэл хот дангаараа үйлдвэрлэж байна. Жил бүр дунджаар аймгийн дайтай дүйцэхүйц хүн ам нийслэлд суурьшдаг боллоо.
