Энэ оны элсэлтийн ерөнхий шалгалт долдугаар сарын 4-7-ны хооронд болно. Жил бүр дундажаар 40 орчим мянган хүүхэд ЭЕШ өгдөг бөгөөд үүнээс 35 мянга орчим нь 12 дугаар анги төгссөн, бусад нь өмнөх жилүүдэд төгссөн сурагч байдаг.
2026 оноос ЭЕШ-д шинэчлэлт өөрчлөлт оруулж бүх төгсөгчдөөс суралцах ерөнхий чадварын шалгалт гэж авдаг болохоор төлөвлөжээ. Энэ шалгалт нь төгсөгчдийн ерөнхий суурь мэдлэг, ур чадварыг нь шалгах зорилготой бөгөөд математик, монгол хэл бичиг, англи хэл гэсэн гурван хичээлийн заавал сурч мэдэх ёстой агуулгуудад суурилсан нэгдмэл шалгалт байна. Мөн зарим хандлага, төлөвлшлийн тест сорилууд багтсан байна гэж Боловсролын зөвлөгөө мэдээллийн төвөөс мэдээллээ. Энэ шалгалтаас гадна Монгол хэл бичгийн шалгалтыг хүүхэд бүр давхар заавал өгнө. Суралцах чадварын шалгалт нь Монгол хэл бичгийн шалгалт шиг босго оноотой, босго оноогоо даваагүй нөхцөлд бусад шалгалтандаа орох боломжгүй байх ажээ.
Мөн ЭЕШ-д оруулах бас нэгэн өөрчлөлт гэвэл физик, хими, биологи гэсэн байгалийн ухааны шалгалтыг дотор нь ангилж байгалийн ухаан-1,2,3 гэсэн хувилбаруудтай болгохоор төлөвлөсөн байна. Өөрөөр хэлбэл физик чиглэлээр дагнах бол байгалийн ухааны 1 гэсэн шалгалтыг сонгох, биологиор гүнзгийрэх бол байгалийн ухаан 3, химийн хичээлээр гүнзгийрч суралцах бол байгалийн ухаан 2 гэсэн шалгалтыг өгөх гэх мэтээр сонголттой болох юм байна. Нийгмийн ухааны шалгалтын мөн Нийгмийн ухаан 1,2,3 гэж ангилж нийгэм, түүх, газарзүйн чиглэлээр нь шалгалтаа сонгох боломжийг хангах ажээ.
Англи хэлний шалгалтыг авахдаа олон улсын зарим шалгалтуудыг өгөх сонголтыг оруулна. Тухайлбал англи хэл 1 гэсэн шалгалт нь ЕБС-ийн сургалтын хүрээнд авах бол Англи хэл 2,3 гэсэн сонголт нь IELTS, TOEFL өгөх боломжтой байдлаар ЭЕШ-ийг зохион байгуулах ажээ.
Өөрчлөгдөөд нээх хэрэггүй байх