Л.Оюун-Эрдэнэ Ерөнхий сайдаар томилогдсоны 3 жилийн ой энэ сарын 27-нд тохионо. Монгол Улс дампуурах уу, эс дампуурах уу гэсэн хатуухан сонголттой нүүр тулсан цагт гүйцэтгэх засаглалын тэргүүн болсон тэрбээр Оюутолгойтой олон зүйлээр холбогдоно. Нэг талаас Оюутолгойн хөрөнгө оруулагчидтай хамгийн хатуу тулсан хүн нь Л.Оюун-Эрдэнэ. Хөрөнгө оруулалтын болоод бусад гэрээ хэлэлцээрүүд Монгол Улсын эрх ашигт нийцээгүй гэж үздэг, үүнийг засах ёстой гэдгээ улстөрч Л.Оюун-Эрдэнэ олон удаа илэрхийлсэн. Ерөнхий сайд болоод энэ байр сууриндаа хатуу зогссон.
Монголчуудыг баахан өрөнд унагасан өнөөх алдартай Дубайн гэрээг байгуулсан Ерөнхий сайд асан Ч.Сайханбилэг асуугдаж, шалгагдах болонгуут гадаад руу гараад сураг алдарсан. Төрийн нууцтай харилцаж, Үндэсний аюулгүй байдлын зөвлөлийн гишүүн байсан Ч.Сайханбилэг эх орноосоо нүүр буруулах болтлоо оргож босно гэхээр Дубайн гэрээ үнэхээр хуудуутай байсныг гэрчлэх биз. Автор нь Америк руу зугтаад явахад ард нь үлдсэн Л.Оюун-Эрдэнэ Дубайн гэрээг цэгцэлсэн нь хувь заяаны шоглоом гэлтэй. Гэхдээ энэ гэрээг Монгол Улсад ашигтай болгож өөрчилсөн нь хамгийн чухал.
Дубайн гэрээг Ерөнхий сайд Л.Оюун-Эрдэнэ яаж сайжруулсан бэ. Хамгийн түрүүнд энэ гэрээгээр Монгол Улсад өр болж бичигдээд байсан 2.3 тэрбум ам.долларыг хөрөнгө оруулагч тал тэглэв. Татварын акт тавиад байсан 700 орчим тэрбум төгрөгийг мөн л Монгол Улсад үе шаттайгаар төлж эхэлсэн. Зөвхөн энэ хоёр шийдвэрийг хөрөнгө оруулагч нартай тохиролцох, зөвшөөрүүлэх гэж маш удаан хэлэлцээ хийсэн. Дубайн гэрээг ингэж сайжруулснаар Монгол Улс ямар их өрийн дарамтнаас гарсныг, нуруун дээрх ачаагаа хөнгөлснийг энэ цаг үеийнхэн мартах учиргүй.
Нөгөө талдаа Оюутолгой бол гуравдагч хөршийн хөрөнгө оруулалттай хамгийн том төсөл. 2022 онд олон жил гацсан Оюутолгойн далд уурхай бүрэн ашиглалтад орсноор дэлхийд 4-т эрэмбэлэгдэх уурхай болж дэлхийн анхааралд дахин орсон. Цуут Дубайн гэрээнээс болж гацсан том төсөл Л.Оюун-Эрдэнийн Засгийн газрын үед ашиглалтад орж, олборлолт эхэлж, эдийн засагт эерэг нөлөө үзүүлж эхэлсэн. Засгийн газраас экспортыг дэмжих тогтоол баталж, хөрөнгө оруулагч нартай хэл амаа ололцсоноор ирээдүй нь эргэлзээтэй байсан энэ том төсөл урагшлав. Том төслийг дагаж жижиг төслүүд амилдаг нь зах зээлийн жам. Одоо эдийн засгийн өсөлтийг өрх бүрийн үүдээр оруулах л үлдсэн.
