Засгийн газрын ээлжит хуралдаан өнөөдөр болов. Энэ үеэр нийслэлийн Засаг даргыг чөлөөлөх, томилох тухай асуудал яригджээ. Ерөнхий сайд Л.Оюун-Эрдэнийн зүгээс нийслэлийн Засаг дарга бөгөөд Улаанбаатар хотын Захирагчаар хууль зүйн сайд Х.Нямбаатарыг томилох бодолтой байгаагаа танилцуулсан байна.
ЗГХЭГ-ын дарга Д.Амарбаясгалан хэлэхдээ "Засгийн газраас шийдвэр гаргаж, БЭТ хэлбэрээр ажиллах нөхцлийг бий болгоё гэж байгаа. Учир нь хотын түвшинд НИТХ үйл ажиллагаагаа явуулж, хотыг удирддаг. Улс төрийн байгууллага улстөрийнхөө үйл ажиллагааг явуулна. Төр засгийн зүгээс анхаарал хандуулж, олон жил бугшсан идээ бээрийг шахахад Засгийн газар бодлогын түвшинд дэмжлэг үзүүлнэ" гэлээ.
МАН-ын Удирдах Зөвлөл 12:00 цагаас хуралдаж, нэр дэвшигчийн талаар хэлэлцсэний дараа НИТХ мөн хуралдаж, шийдвэрээ гаргана. Үүний дараа Хотын даргыг томилох Ерөнхий сайдын захирамж гарах хуулийн зохицуулалт бий.
Х.Нямбаатар Хотын даргаар томилогдоно гэвэл эхлээд УИХ-ын гишүүнээс чөлөөлөгдөж, дараа нь Хууль зүйн сайдаар орных нь хүнийг томилно. Хууль зүй, дотоод хэргийн сайдаар УИХ-ын гишүүн Б.Энхбаярыг томилж магадлал хамгийн өндөр байна.
