"Улаанбаатар төмөр зам" хувь нийлүүлсэн нийгэмлэгийн Ерөнхий хорооны ээлжит хуралдаан өнөөдөр болжээ. Тус хурлаар УБТЗ-ын даргын томилгоог хэлэлцэж Х.Хэрлэнг томилохоор болсон байна. "Улаанбаатар төмөр зам" хувь нийлүүлсэн нийгэмлэгийн дүрмийн дагуу УТБЗ-ын даргыг томилохдоо Монгол, Оросын тал гурван жилээр ээлжилдэг дүрэмтэй. 1949 онд Улаанбаатар төмөр зам байгуулагдсанаас хойш 1991 оныг хүртэл орос даргатай явсан бөгөөд 1991 оноос монгол дарга томилогдож, түүнээс хойш гурван жилээр ээлжлэн томилдог болсон аж.
УБТЗ-ын даргад Монголын талаас хэд хэдэн хүний нэрийг өнгөрсөн зун санал болгосон ч Оросын тал хариу өгөөгүй байсан м. Х.Хэрлэнг Монголын Засгийн газраас санал болгосон бөгөөд УБТЗ-ын даргын ажлаа маргааш албан ёсоор хүлээн авах аж. Х.Хэрлэн нь "Монголын төмөр зам" ТӨХК-ийн гүйцэтгэх захирлаар ажиллаж байсан туршлагатай бөгөөд орос хэлтэй аж. Тэрбээр 2017 оноос Ашигт малтмал, газрын тосны газрын даргаар томилогдон ажиллаж байсан юм. Түүний товч намтрыг хүргэе.
1967 онд Хэнтий аймагт төрсөн. 1985-1991 онд Политехникийн Дээд сургуулийг барилгын инженер мэргэжлээр, 1999-2001 онд МУИС-ийн ХЗДС-ийг Эрх зүйч мэргэжлээр тус тус суралцаж төгссөн. Техникийн Ухааны магистр зэрэгтэй.
Ажилласан байдал:
- 1991-1992 онд Барилгын зургийн институтэд Зургийн техникч
- 1995-1999 онд “Үлэмж” ХХК-ийн Дэд захирал
- 2000-2006 онд АМХЭГ-ын Геологи Уул Уурхайн Кадастрын албаны дарга
- 2006-2007 онд Үйлдвэр Худалдааны Яамны Хөнгөн үйлдвэрийн газрын Орлогч дарга
- 2008-2010 онд “Эйч ти эм” ХХК-ийн Захирал
- 2010-2012 онд ТӨХ-ны Төрийн өмчийн удирдлага, хувьчлалын газрын дарга
- 2012-2016 онд “Эйч ти эм” ХХК-ийн Захирал
- 2016-2017 оны “Монголын Төмөр Зам” ТӨХК-ийн Гүйцэтгэх захирал
- 2017-2021 онд Ашигт малтмал, газрын тосны газрын дарга
