Коронавирусийн шинэ хувилбарыг анхаарвал зохих аюултай гэдэг ангилалд оруулан омикрон гэж нэрлэсэн бөгөөд энэ нь дельта хувилбараас хэд дахин илүү хурдтай тархах магадлалтай гэж ДЭМБ-аас мэдээлж, зөвлөмж гаргасантай холбогдуулан Улсын онцгой комисс өнөөдөр хуралдаж яаралтай авах арга хэмжээний талаар ярилцжээ. Улсын онцгой комиссын 29-р хуралдааны шийдвэрийн талаар Улсын онцгой комиссын дарга, Монгол Улсын Шадар сайд С.Амарсайхан, Эрүүл мэндийн сайд С.Энхболд, Улсын онцгой комиссын нарийн бичгийн дарга Т.Баярхүү нар мэдээлэл хийлээ. УОК-оос ДЭМБ-ын зөвлөмжтэй холбогдуулан хэд хэдэн шийдвэр гаргасан байна. Тухайлбал, дээрх шинэ хувилбарын халдвар тархсан улс орнууд тодруулбал Өмнөд Африкийн бүгд найрамдах улс болон Ботсвана, Зембабве, Лесота, Маливи, Намиби, Мозамбик, Мальдив, зөөвөрлөгдсөн Бельги, Израйл, Хонконг улсуудаас ирсэн, түүгээр зорчиж, дайран өнгөрсөн гадаадын иргэдийг Монголд хүлээн авахгүй, харин тэдгээр улсаас ирсэн Монгол Улсын иргэдийг эх орондоо хүлээн авсны дараа 10 хоног тусгаарлалтад байлгахаар болжээ. Гуравдугаарт өнөөдөр 200 гаруй энхийг сахиулагч эх орондоо ирж байгаа. Хэдийгээр тухайн улс оронд нь халдвар бүртгэгдээгүй, энхийг сахиулагчид өөрсдөө шинжилгээгээ өгсөн боловч тэднийг ирснийх нь дараа мөн 10 хоног тусгаарлахаар болсон байна. Мөн агаарын болон төмөр зам, авто тээврийн боомтуудаар зорчигчдоос иж бүрэн шинжилгээ авах, иргэдийг аль болох гадаадад аялахгүй байх, шинэ халдвар тархсан улс орнуудад аялахаас татгалзах, хэрвээ аялсан бол эх орондоо ирээд мөн 10 хоног хязгаарлалтад байхаар зохицуулалт хийжээ.
