Уучлаарай ээжийн үрс ээ, зээлийн байр, хөл дүүжлэх унаа авч “Хүүхдийн мөнгө”-авах эрхгүй болгосондоо та хоёроосоо уучлал гуймаар санагдлаа. Өнөөг хүртэл аав, ижий нь болгох гэж зүтгэж ирж хойд хормойгоо хайчлан урд хормойгоо нөхөөд, нэг хүний сарын 1500.000 төгрөгийн цалингийнхаа 30-40 хувийг татвар, шимтгэл гэж улсдаа тушаагаад, байрны зээлэндээ бараг үлдсэн бүгдийг нь өгчихөөд үлдсэн хэдээрээ хоол ундаа болгож улстөрчдийн хэлдгээр УЛНЫ гэх тодотголоор явсаар ирлээ.
Хэдий дутуу гуцуу байсан ч “Хүүхдийн мөнгө”-ндөө хүрэлгүй, хүүхдүүдийнхээ боловсрол, ирээдүйд бага ч болов хэрэг болно хэмээн хадгалж байсан нь ээж, аавынх нь буруу байжээ. Ордонд суудаг “Ухаантай” ах, эгч нар нь хүүхдийн мөнгөө хуримтлуулдаг, байртай, машинтай хүмүүсийн үрсийг “Хүүхдийн мөнгө” авах эрхгүй гэж үзжээ.
Зээл яах вэ төлж л таарна, идэж, уух өмсөх зүүхээ танаад ч болов хүүхдүүдээ дулаан тохьтой орчинд өсгөе гээд орон сууцанд ордог нь илүү зан байж. Нийтийн тээвэр хөгжөөгүй хотод хүүхдүүдээ дааруулж зутраахгүй гээд хөл дүүжлэх унаатай болох ч ёсгүй л байсан бололтой. Гаднын аргачлалыг хуулахдаа Монголынхоо хөрсөн дээр буулгаж, хөрөнгийг нь тооцохдоо зээлийг нь ч давхар тооцож тухайн айлын бодит санхүү рүү өнгийж харах чадваргүй, ХАРАЛГАН ТӨРтэй улсад төрүүлж өсгөсөнд уучлаарай үрс минь. Хүүхдийн мөнгө бол халамж биш гэдэг атлаа хүүхдийн мөнгөн тэтгэмжээ хүний алаг үрсийг ялгаж олгодог дарга нарын өмнөөс уучлал гуйя, ээж нь.
Нийт хүүхдийн 91 хувьд нь “Хүүхдийн мөнгө” олгоно оо гэж Төрийн ордонд суудаг ах нар нь амалсан. Гэхдээ 91 хувьд олгож чадсан эсэхэд ээж нь эргэлзэж сууна. ХУДАЛЧ ТӨРтэй улсад төрүүлж, өсгөсөнд уучлаарай үрс минь. АТГ-ынхан бэлнээр 250 мянган доллар илрүүлэхэд "Хүн гайхах их мөнгө биш ээ" гээд хээвнэг зогсож байдаг Үндэсний статистикийн дарга Хүүхдийн мөнгийг хасаж, танах журмыг боловсруулсан юм шүү. Үүнийг бимтгий мартаарай. Тэр ахынх нь амьдрал бусдаас тасарсан байж болох ч монголчуудын жирийн өрх, гэр бүлүүдийн хувьд татварын энэ их дарамт дор өнөө маргаашаа дөнгөн данган болгож л яваа нь үнээн.
Дундаж давхрагаа дэмжинэ гэх гоё үгийг ТӨР хэлдэг мөртлөө яг бодит амьдрал дээрээ дэмжлэгийг нь мэдэрч байсангүй. “ДУНД”-ын гэх тэр хэсгийг татвар, шимтгэлээ төлж, бор зүрхээрээ амьдралаа арай ядан болгож яваа УЛНЫ бид нар л чирч явна. Татвар нэмэхгүй гэж амалж явсан дарга нарын үг замхарч, өөрсдийгөө болгож ядаж яваа хувийн хэвшлийнхэн, төрийн албаныхан, жижиг дунд бизнес эрхлэгчид улам л улдаж ядарсаар.
Дундаж давхрагаа тасдаж мэрдэг энэ улсад хорооныхон хашаагаа цэвэрлэхгүй байна гэж шаардаж хэвтдэг сэтгэхүйтэй том масс, эсрэг талд нь тэнгэрийн амьдралтай тасарсан баячууд л торойж үлдэх нь. Бодлогогүй, сэтгэлгүй ТӨРтэй улсад төрүүлж, өсгөж байгаад уучлаарай үрс минь.
Хүүхдийн мөнгө бол халамж биш УИХ-ын дарга нь хэлнэ лээ. Халамж биш юм бол аав, ээж нь хөдөлмөрлөж, хичээж, зүтгэж, болгох гэж тэмүүлж байгаа нь "Хүүхдийн мөнгө"-нөөс хасагдах шалтгаан болох ёсгүй!!!
