УИХ-ын ээлжит чуулганы үеэр Хянан шалгах түр хорооны ажиллах хугацааг сунгах тухай УИХ-ын тогтоолын төслийг хэлэлцэх үеэр гишүүд нийгэмд сүүлийн үед шуугиан болоод байгаа нүүрсний хулгай, түүнтэй холбоотой 40 их наяд төгрөгийн асуудлаар нэлээд маргалаа. МАН-ын гишүүд энэ үеэр нүүрсний хулгайтай холбоотой баримт мэдэж байгаа гэж яриад байгаа хүмүүс нь тэднийхээ нэрийг хүмүүс нь зарла, битгий нийтэд нь нэргүй мэдээлэл ярьж гэмгүй хүмүүсийг буруутга гэсэн хандлагатай шүүмжлэл хэлж байсан байв.
УИХ-ын гишүүн Ш.Адьшаа:
-Миний бие 2022 оны зургадугаар сарын 3-ны өдөр УИХ-ын гишүүнийхээ хууль санаачлах бүрэн эрхийн хүрээнд Хилийн боомтын үйл ажиллагаа, нүүрс тээвэрлэлттэй холбоотой ажлыг шалгах, УИХ-ын Хяналт шалгалтын тухай хуулийн дагуу түр хороо байгуулахаар 26 гишүүнээр гарын үсэг зуруулж, байгуулсан. Энэ хугацаанд нүүрсний хулгай, оффтэйк гэрээтэй холбоотой олон ажлыг хийж, судалгаа, дүгнэлт хийсэн. Энэ асуудал өнөөдөр нийгэмд олны анхаарлыг татаж байна. Одоо энэ асуудалд анхаарах цаг зайлшгүй болсон.
УИХ-ын гишүүн С.Чинзориг:
-Хянан шалгах түр хорооны ажиллах хугацааг сунгахыг дэмжиж байна. Гэхдээ бид амаргүй нөхцөлд ажиллаж байна. Иргэд нүүрсний хулгайн төлөө жагсч байна. Түр хороо байгуулаад зургаан сар болохдоо ямар ажил хийж, үр дүнд хүрсэн бэ. Хийж чадахгүй байгаа, УИХ болон парламентаас дэмжлэг авах ямар асуудал байна? Нууцлалын гэрээ хэчнээн байна вэ?
УИХ-ын гишүүн, Түр хорооны дарга Г.Ганболд гишүүн:
-Манай түр хороог УИХ-аас байгуулсан гурав дахь түр хороо. Өмнөх түр хороодуудыг сунгаад явж байгаа. Бид нотлох баримт цуглуулах, гэрч дуудаж байцаах гээд цаг хугацаа их орж байна. Хянан шалгагчид ажиллаж, байцаагч нар цуглуулсан материал дээр сууж байна. Тиймээс бид шууд зарлахад эрт байна. Түр хорооны хугацааг сунгах асуудлыг ярьж байна. Өмнө нь УИХ-ын гишүүд нүүрсний хулгайг хэлж байсан ч хэн ч тоогоогүй. Нууц гэрээ учраас УИХ-ын гишүүд ч үүнтэй танилцах боломжгүй байгаа. Харин УИХ-ын түр хороо нууц гэрээтэй танилцах боломжтой. Хяналтын ерөнхий сонсгол хийх ажлын хэсэг байгуулагдаж, нууц гэрээнүүдийг ил болгож арванхоёрдугаар сарын 21-нд хэлэлцэнэ. Энэ бол түр хорооны хамгийн том үр дүн. Нууц гэрээний цаана төмөр замуудыг хэчнээн төгрөгөөр байгуулж, үр дүнд нь хэчнээн тонн нүүрсийг ямар үнээр авсныг ил болгоно.
УИХ-ын гишүүн Т.Доржханд 44 их наяд төгрөгтэй холбоотой мэдээлэл хийсэн. Энэ гишүүн түр хорооны гишүүн боловч хуралдаа нэг ч суугаагүй. Түр хороон дээр 44 их наядтай холбоотой мөнгөн дүнгийн асуудал яриагүй.
Т.Доржханд гишүүн 40 их наяд гэсэн үндэслэл, тоог анх хаанаас яаж тооцож гаргаж ирсэн бэ? Энэ үндэслэлээ тайлбарла, хаанаас юм үндэслэлгүй тоо гаргаж ирээд үүнээс нь болж хүйтэнд хүмүүс жагсаад байна. Буруу мэдээлэл ард иргэдэд өгсөн бол нийгмийг талцулсан мэдээллийнхөө төлөө хүйтэнд даарч зогссон ард иргэдээсээ, бэртэж гэмтсэн цагдаагийн албан хаагчдаасаа уучлал гуйх ёстой.
УИХ-ын гишүүн Т.Доржханд:
-40 их наяд гэж юу яриад байгаа юм гэж МАН-ынхан яриад байна. Намайг үндслэлгүй тоо ярилаа гээд байна. Та нар боль л доо. 40 их наяд гэдэг бол МУ-ын эдийн засагтай тэнцэх хэмжээний мөнгө. МУ-ын эдийн засагтай тэнцэх хэмжээний мөнгө алдсан байна гэж Ерөнхий сайд хэлсэн шүү. Тийм ч болохоор 40-45 их наяд төгрөг алдагдсан байна гэж би хэлсэн. Засгийн газар дээр ч энэ талаарх тооцоо судалгаа нь байх ёстой. Би ч нарийн тооцоо судалгааг хийнэ, бүү санаа зов. Нүүрснээс олсон нэг их наяд төгрөг нь төсөвт орж, хоёр их наяд төсвийн гадна үлдэж байсан нь үнэн. Оффтейк гэрээний ард олон хүний асуудал ил болно шүү!
УИХ-ын дарга Г.Зандашатар:
Нэрээ зарла. Эзэн холбогдогчгүй хэрэг гэж байхгүй. Нүүрс өөрөө алга болоо юу.
