Нүүрсний хэрэг нийгэмд дуулиан тарьж, уг гэмт хэрэгт холбогдсон төрийн өндөр албан тушаалтнуудыг зарлахыг шаардсан олон нийтийн жагсаал, цуглаан дөрөв дэх өдрөө үргэлжлэв. Монгол Улсын Ерөнхийлөгч У.Хүрэлсүх өнөөдөр Хууль зүй, дотоод хэргийн сайд болон АТГ, ЦЕГ, УЕПГ-ын дарга нарыг дуудаж уулзан хатуу донгодлоо. Тэрбээр, "Эрхтэн дархтнууд УИХ-д суучихаад өөрсдийгөө өмгөөлөөд байгаа бол бүрэн эрхийг нь түдгэлзүүл. Гэмт хэрэгтнүүдийг эрхийг нь түдгэлзүүлэх гээд ороод ирэхэд хамгаалж үлдэх нь үү, харъя. УИХ, Засгийн газрыг ажлаа хий гэж шаардсан. Өнөөдөр та нарыг огцор гэж шаардаж эхэлж байна. Ажлаа хийхгүй болохоор чинь огцор гэж шаардаж байна. Та бүхэн энэ асуудлыг яаралтай шийдэж чадахгүй бол УИХ, Засгийн газрын хувь заяаны асуудал яригдана шүү. Үүнийг би хэлчихье. Та нар ажлаа хийж чадахгүй бол ард түмэн дахин сонголтоо хийж төр, засгаа эмхлэн байгуулах боломжийг нь олгох тэр цаг ирж магадгүй шүү. Зүрх сэтгэлээрээ хулгай дээрэмтэй тэмцье гэж ард түмэн нэгдэн нягтарч байгаа. Энэ бол сайн үйл хэрэг. Ард түмнээс сонгогдсон төрийн тэргүүний хувьд би ард түмнийхээ талд хатуу зогсоно. Сайд дарга нар, хулгай хийчихсэн албан тушаалтнууд байгаа бол бүгдийг нь түдгэлзүүлж байгаад шалга" гэсэн юм.
Нүүрсний хулгай гэх энэ хэрэг багаар бодоход 3.2 сая тонн нүүрс хууль бусаар хилээр гаргасан асуудал. Асар нарийн зохион байгуулалттай, сүлжээ болж хийгдсэн гэдэг нь тодорхой. Үүнд, эдүгээ төрийн өндөр албан тушаал хашиж буй улстөрчид нэр холбогдож буй гэсэн таамаг байгаа ч албан ёсоор зарлаагүй. УИХ-ын танхимд ч нүүрсчид нэг бус суугаа гэж олон нийт хардаж байгаа. Үүнийг Ерөнхийлөгчийн өнөөдрийн үг ч баталж байна. Тиймээс өнөөгийн УИХ-д нүүрсний хэрэгт холбогдсон гишүүдээ ил тод зарлаж, бүрэн эрхийг нь түдгэлзүүлэн хууль хяналтынханд тушаах эр зориг, хүсэл эрмэлзэл байгаа эсэхийг харах үлдлээ.
