Залуус өвлийн эхэн сарын тэсгим хүйтнийг үл тоон нүүрсний хулгайчдын эсрэг жагсав. Улс төр, бизнесийн хүрээнд аалзны тор шиг нарийн сүлжилдэж, хэлхэлдсэн "нүүрсний нам"-ынхныг нэрлэж, зарлах, хариуцлага тооцохыг тэд шаардсан. УИХ, Засгийн газрын гишүүд, төрийн албаны өндөр дээд түвшинд ажиллаж буй эрх мэдэлтнүүд холбогдсон нүүрсний хэрэг бол цөөн хэдэн хүнээр туг тахиад дуусах асуудал биш. Үндэс, хөрс нь байгаа цагт хогийн ургамал шарилж дахин дахин ургадаг. Түүн шиг нүүрсний хулгай, Хөгжлийн банкны луйвар гэх мэт их наяд их наядаар яригдах гэмт хэргүүд тогтолцооны өөрчлөлт, хууль эрх зүйн шинэчлэл хийхээс нааш арилахгүй.
Авлигын хөрсийг үгүй болгох ажил Улс төрийн намын тухай хууль, Сонгуулийн тухай хуулиудыг шинэчлэхээс эхэлнэ. Бүр уг үндсээр нь устгая гэвэл Үндсэн хуульдаа өөрчлөлт оруулах нь илүү оновчтой. Сонгуулийн тогтолцоог Үндсэн хуульд тусган хуульчилна гэсэн үг. Ингэж чадвал жинхэнэ хувьсгал, жинхэнэ өөрчлөлт болно. УИХ-ын сонгууль бүрийн өмнө сонгуулийн тухай хуульд гар хүрдэг, тэгэхдээ эрх барьж буй намууд өөрсдөд ашигтай хувилбарыг л сонгодог бусармаг жишиг сүүлийн арав гаруй жил үргэлжилж байгаа. Үүнийг Үндсэн хуулиар л таслан зогсооно. Өөрөөр хэлбэл, Үндсэн хуульд нэмэлт, өөрчлөлт оруулж сонгуулийн тогтолцоог хуульчлан тусгаж өгөх нь зөв. Ингэж гэмээнэ улс төрийн нам, улс төрийн сонгууль аль аль нь өөрчлөгдөнө.
Өнөөдөр үүсээд байгаа төрийн хямрал, ялзрал, доройтол нам, сонгууль хоёроос эхтэй гээд хэлчихэд болно. Нам бол эрх мэдэл, албан тушаалын ТҮЦ, өндөр түвшний авлига цэцэглэх таатай нөхцөл, орчин нь. Тэрхүү таатай нөхцөл, орчинд хүрэх шат гишгүүр нь сонгууль. Тиймээс улстөрчид эрх мэдэл, албан тушаалд хүрэх шат, гишгүүрээ ямагт зөөлөн, найдвартай, өөрсдөдөө үргэлж ээлтэй, ашигтай байлгахыг хичээсээр иржээ. Энэ ялзралыг засах хамгийн сайн арга нь дахин хэлэхэд Үндсэн хуулийн өөрчлөлт, түүнийг дагаад сонгуулийн болон улс төрийн намын тухай хуулиудад оруулах өөрчлөлтүүд байх болно. Сонгуулийг холимог тогтолцоогоор явуулна гэдгийг, мөн улс төрийн намуудын санхүүжилтийг эрүүл, зөв болгох зохицуулалтыг Үндсэн хуульдаа тусгаж өгөх хэрэгтэй. Сонгуульд хэн их мөнгө зарцуулсан нь биш хэн хамгийн зөв, оновчтой үзэл баримтлал, мөрийн хөтөлбөр дэвшүүлсэн нь ялдаг болох, намууд мөнгөтэй хүний халаасанд орж, бохир санхүүжилтээр амь зуудаггүй болох тийм хууль эрх зүйн орчин бүрдэж байж өнөөгийн улс төрийн завхрал арилна. Нийгмийнхээ "өвчин"-ийг бид зөв оношилж байж л бүрэн эрүүлжүүлнэ. Түүнээс биш түр зуурын өвчин намдаах эм огт хэрэггүй.
