Финляндын "Аалто" их сргуулийн эрдэмтэд архи, хар тамхины донтолттой тэмцэх "Hento Touch" нэртэй нэгэн бугуйвчийг бүтээж байна. Энэ бугуйвч нь арьсанд тааламжтай хүрэлцэх замаар согтууруулах ундаа уух хүслийг дарах зориулалттай бөгөөд энэ нь C-tactile гэж нэрлэгддэг мэдрэлийн замыг идэвхжүүлж, архины дуршил болон бусад донтолттой нягт холбоотой тархины хэсгүүдэд хүрдэг байна. Мөн тааламжтай хүрэлтээр допамин, окситоцины ялгаруулалтыг дэмжиж стрессийг бууруулах чадвартай ажээ. Энэ бугуйвчийг сэтгэл зүй, нийгмийн эмчилгээ, эм бэлдмэл зэрэг бусад эмчилгээтэй хослуулан хэрэглэвэл донтолтыг эмчилж чадна гэж мэргэжилтнүүд үзэж байна.
"Бидний хөгжүүлж буй "Hento Touch" төхөөрөмж нь технологид суурилсан эмнэлгийн анхны шийдэл байх болно, төсөл амжилттай хэрэгжвэл энэ шийдэл нь дэлхий даяар архины донтолтын эмчилгээг сайжруулж чадна гэж багийн маркетингийн менежер Жукка Планман хэлэв. "Hento Touch"-ийг мөрийтэй тоглоомд донтох зэрэг ижил төстэй өвчнийг эмчлэх, стрессийг зохицуулахад ашиглахаар төлөвлөж байгаа бөгөөд эмийн санд жоргүйгээр худалдаалах ажээ.
