БНХАУ-ын дарга Ши Жиньпин, АНУ-ын ерөнхийлөгч Жосеф Байден нар Индонезийн Бали аралд тухайн орон нутгийн цагаар 11 сарын 14-нд уулзаж гурван цаг орчим ярилцжээ. Хоёр орны тэргүүн Америк, Хятадын харилцааны стратегийн асуудал, дэлхийн болон бүс нутгийн томоохон асуудлаар санал солилцсон ба Ши Жиньпин энэ үеэр Хятад, Америкийн харилцаа заавал хожиж хожигдохын үр дүнтэй байх биш, хоёр орны өнөөгийн амжилт нь бие биедээ сорилт биш илүү боломж болох хэрэгтэйг хэлжээ. Мөн Ши Жиньпин Тайваний асуудлын гарал үүсэл, Хятадын байр суурийн тухай тайбарлаж, Тайваний асуудал бол Хятадын язгуур ашиг сонирхлын гол цөм, Хятад Америкийн харилцааны улс төрийн үндэс суурь, Хятад Америкийн харилцааны хэтрүүлж болшгүй анхны улаан шугам юм. Тайваний асуудлыг шийдэх нь Хятадын ард түмний өөрийнх нь хэрэг хэмээжээ.
Жо Байден, хоёр том гүрний хувьд АНУ, Хятад хоёр орон бүтээлч харилцаагаа хадгалах үүрэгтэй гээд "Хоёр тал санал зөрөлдөөнтэй байгаа асуудлаар илэн далангүй яриа хэлэлцээ хийж, уур амьсгалын өөрчлөлт, хүнсний аюулгүй байдал зэрэг дэлхийн томоохон сорилтуудыг шийдвэрлэхэд шаардлагатай хамтын ажиллагааг бэхжүүлэхэд чухал үүрэг гүйцэтгэхийг эрмэлзэж байна. Энэ нь АНУ, Хятад болон хоёр ард түмэнд чухал ач холбогдолтой бөгөөд дэлхийн хэмжээнд чухал ач холбогдолтой юм. Тогтвортой, хөгжиж буй Хятад улс нь АНУ болон дэлхийн ашиг сонирхолд нийцнэ гэдгийг дахин хэлмээр байна. АНУ Хятадын тогтолцоог хүндэтгэдэг, Хятадын тогтолцоог өөрчлөхийг эрмэлздэггүй, шинэ хүйтэн дайн эхлүүлэхийг эрмэлздэггүй, эвслийг бэхжүүлэх замаар Хятадыг эсэргүүцэхийг эрмэлздэггүй, "Тайванийг тусгаар тогтнуулах"-ыг дэмждэггүй, "хоёр Хятад" " нэг Хятад, нэг Тайвань" гэдгийг дэмжихгүй бөгөөд Хятадтай мөргөлдөөн үүсгэх бодолгүй байна. АНУ Хятадын эдийн засгийн хөгжилд саад учруулах, Хятадыг хязгаарлах бодолгүй байна" гэсэн байр суурийг илэрхийлсэн байна.
Мөн Хойд Солонгосын явуулж буй пуужингийн болон цөмийн үйл ажиллагааг намжаахад Бээжин ч гэсэн оролцох үүрэгтэй онцолжээ.
Хоёр орны төрийн тэргүүн мөн Украины хямралын асуудлаар санал солилцсон байна.
Уулзалт гүн гүнзгий, илэн далангүй, бүтээлч болсон гэж хоёр тал үзэж, хоёр орны төрийн тэргүүн нарын тохиролцсон чухал зөвшилцлийг цаг тухайд нь мөрдөж, хэрэгжүүлэн, бодитой арга хэмжээ авч, Хятад, Америкийн харилцааг тогтвортой хөгжлийн замд оруулахыг хоёр орны ажлын багуудад үүрэг болгосон хэмээн БНХАУ-ын тал уулзалтын талаар дүгнэсэн байсан бол CNN энэ уулзалтаар Жо, Жинпинь нар хоёр орны харилцаан дахь галыг намжаасан ч сөргөлдөөн хэвээр үлдсэн гэж дүгнэжээ.
