Дархан-Уул аймгийн Дархан сумын “Оюуны ирээдүй” цогцолбор сургуулийн хичээлийн "А" байрны нэг давхарт хий цацсанаас үүдэн багш, сурагч, сургуулийн ажилтнууд хордсон байж болзошгүй хэрэг гарчээ. Уг хэргийн улмаас нийт 31 сурагч, зургаан том хүний хамтаар эмнэлэгт хэвтүүлсэн байна. Тухайн иргэдийн биеийн байдал тааруу бөгөөд хоёр хүнийг эрчимт эмчилгээний тасагт хэвтүүлсэн гэж албаны эх сурвалж мэдээллээ.
Энэ хэргийг цагдаагийн байгууллагаас тодруулж, хий цацсан этгээдийг илрүүлсэн эсэхийг тодруулбал “Өнөөдөр 11:05 цагаас тус сургуульд шалгалт хийсэн. Тухайн сургуулийн 12 дугаар ангийн сурагч эрэгтэй С, эмэгтэй “Э нар нь БНХАУ-д үйлдвэрлэсэн байж болзошгүй хаяг шошготой харуул хамгаалалтын зориулалт бүхий нулимс асгаруулагч гэх цацлага цацсан байна. Их завсарлагааны үеэр нэг давхрын цайны газрын коридорт нэг удаа цацсан нь камерын дүрс бичлэгээр тогтоогдлоо. Тухайн хэргийг үйлдсэн сурагчид бичлэг болон эд мөрийн баримтыг хогийн саванд хаяснаа өөрсдөө зааж өгсөн” гэв.
