Нийслэлийн Аялал жуулчлалын газар, Байгаль орчин, Аялал жуулчлалын яам, Монголын Аялал жуулчлалын холбоо, Булган аймгийн ЗДТГ-тай хамтран “Ай Ти Эм" Олон Улсын аялал жуулчлалын үзэсгэлэнг энэ сарын 28-30-ны өдрүүдэд “Мишээл экспо” төвд зохион байгуулах гэж байна. Үзэсгэлэнд нийслэл хотын 9 дүүрэг, 21 аймаг болон ОХУ-н Буриад, Тува, Халимаг улсын 280 орчим аялал жуулчлалын бизнес эрхлэгч, аж ахуй нэгж байгууллагууд оролцож, аяллын бүтээгдэхүүнээ санал болгох юм.
Мөн үзэсгэлэнгийн “Түнш аймаг” –аар тодорсон Булган аймаг нь энэ оныг “Ногоон аялал жуулчлалыг дэмжсэн, байгаль эх дэлхийдээ ээлтэй аялал жуулчлалын жил" болгон зарлаж, төр хувийн хэвшлийн хамтын ажиллагааг өргөжүүлэх, жуулчдыг татах, ая тухыг хангах, орон нутгийн иргэдийн эдийн засагт дэм болох тал дээр анхаарч ажиллаж байгаа юм.
"ШИНЭ СЭРГЭЛТ- АЯЛАЛ ЖУУЛЧЛАЛ" уриан дор явагдах олон улсын үзэсгэлэнг угтаж:
- 2022.10.26 -нд “Миллениум Плаза” Зочид буудлын 6 давхар хурлын зааланд аялал жуулчлал, зочлох үйлчилгээний салбарын бизнес эрхлэгчдийн “Хамтын ажиллагаа” сэдэвт хэлэлцүүлэг
- 2022.10.27-нд “Blue sky “зочид буудлын хурлын танхимд “Турк аяллын компаниудын бизнес уулзалт”
- 2022.10.28- 30 өдрүүдэд “Мишээл экспо төв”, “Ибис” зочид буудлын хурлын зааланд Аялал жуулчлал, зочлох үйлчилгээний салбарт хэрэгжиж буй төсөл хөтөлбөр, сургалт хамтын ажиллагааг танилцуулах арга хэмжээнүүдийг зохион байгуулахаар төлөвлөөд байна.
