Ирэх онд төрийн алба хаагчдад олгох цалин, урамшуулалд хэд хэдэн өөрчлөлт оруулах хуулийн төслийг УИХ-ын байнгын хороогоор хэлэлцэж байна.
Тодруулбал, Төрийн захиргааны болон тусгай албан хаагчдын цалинг нэг суурьтай болгох юм байна. Ингэснээр 165 ялгаатай цалингийн системтэй байсныг 20 ялгаатай цалинтай болгож өөрчлөхөөр болжээ.
Мөн төрийн албан хаагчдын ажилласан хугацааны нэмэгдлийг жил тутам олгодог болох нь ээ. Одоогийн хуулиар төрийн албан хаагчид 5-10, 10-15 гэсэн хугацаагаар энэхүү нэмэгдлээ авдаг . Харин жил бүр ажилласан хугацааны нэмэгдлээ авдаг болсноор 1 жил ажилбал 1 хувь, 2 жил ажилбал 2 хувь, 3 жил ажилбал 3 хувь зэргээр нэмэгдэж тооцуулах ажээ.
Төрийн ТҮ-ний ажилчдын цалинг 6-8 хувиар нэмэгдүүлэхээр төсөлд тусгасан байгаа бөгөөд орон нутагт ажилладаг төрийн захиргааны албан хаагчдад орон нутгийн нэмэгдэл өгөхөөр тусгасан байна. Орон нутгийн суурь зардал дээр нь 20 хувиар тооцож улсын төсвөөс олгон, үлдсэн 80 хувийг тухайн орон нутгийн төсвөөс олгох боломжтой гэж үзжээ. Дээрх арга хэмжээнд 168 мянга орчим төрийн албан хаагчид хамрагдах юм байна.
