Зам тээвэр, хөгжлийн сайд С.Бямбацогт Дарханы замын ажлын явцад амралтын өдрөөр гэнэтийн шалгалт хийсэн байна. Тэрбээр уг шалгалтаа хийх тухай ямар ч зар түгээлгүй өөрийн биеэр очсон тухай сошиал орчинд тавигдсан юм. Учир нь, ажлаа хийхгүй назгайрч сууна уу, асуудал тариад байгаа цементийн хангамж жигдэрсэн эсэхийг ийнхүү газар дээр нь гэнэтийн байдлаар очиж харсан нь тэр.
Энэхүү шалгалтад гүйцэтгэгч компаниуд онц сайн дүн авсан төдийгүй цементийн асуудлаа гэрээ хэлэлцээрийн дагуу нийлүүлэх ажлаа ч амжуулчихсан, ажил нь ид дундаа ундарч байсан байна. Уг замыг тавих гол бүтээгдэхүүн болох цементийн нийлүүлэлт тасалдсанаас зам барих ажил багагүй хугацаанд завсардсан талаарх мэдээлэл бий. Тэгвэл саяхнаас тогтвортойгоор цементээр хангах гэрээ хийгдсэнээр замын ажил эрчимтэйгээр урагшилж эхэллээ.
Сайд өөрийн нүүр номын хуудаснаа "Дарханы замд ажиллаж, замын ажлын явц байдалтай танилцлаа. Очно, танилцана, шалгана гэж хэнд ч хэлсэнгүй хэл чимээгүй очоод газар дээр нь яваад үзэж харлаа. Ямар ч байсан дотоодын цементийн үйлдвэрүүдтэй шуурхай хамтран ажилласны үр дүн гарч цементийн нийлүүлэлт, тээвэрлэлтийн асуудал хэвийн болжээ. Энэ ажилд том дэм болж буй цемент үйлдвэрлэгч үндэсний компаниуд болох Монцемент ХХК, Налгар түшиг ХХК-ийнхандаа БАЯРЛАЛАА. Гүйцэтгэгч компаниудад уртасгасан цагаар ажиллах үүрэг чиглэл өгсний дагуу ажил овоо эрчимжжээ.
8 дугаар сарын 25-наас хойш шинээр 45 км замын хөдөлгөөн нээгээд байна.
Одоо Аглагийн хийд салдагаас Урьхан хүртэл 20 км, Баруунхараагийн сэтэрхий хөтөлөөс Хустайн давааны ар хүртэл 21 км асфальт хучилтын ажил үлдээд байна.
Гэхдээ гүйцэтгэгч компаниуд өөрсдөө санхүүжилт, цаг агаарын нөхцөл байдалтай уялдуулан ажлаа урьдчилан харж төлөвлөж, зөв зохион байгуулах хэрэгтэй байгааг хэлж санууллаа.
Хүн хүч, машин техникээ зөв хуваарилж ажлаа цаг хугацаанд нь, чанартай шахаж хийж чадвал 1 урсгал 2 эгнээний хөдөлгөөн нээх бодитой боломж байна. ТӨЛӨВЛӨГӨӨ-ГҮЙЦЭТГЭЛ-ЧАНАР-ҮР ДҮН гэсэн тулгуур 4 зарчмыг баримтлаад, мөрдөөд, хэрэгжүүлээд энэ эрчээ ахиад жаахан нэмээд зүтгэхэд болно л гэж харагдаж байна" гэсэн байна.
хэрэгжүүлээд энэ эрчээ ахиад жаахан нэмээд зүтгэхэд болноо л гэж харагдаж байна.
Үүнээс гадна Зам тээвэр хөгжлийн сайд өнгөрсөн долоо хоногт мэдээлэл хийх үеэрээ "Одоогоор нийт 200 гаруй км замын 160 орчим нь хатуу хучилттай болсон. Ирэх сарын 30-ныг хүртэлх хугацаанд үлдсэн 40 орчим км замыг хатуу хучилттай болгохоор төлөвлөж байна. Цементийн хомсдол үүссэн. Учир нь Хөтөлийн цемент шохойн үйлдвэр зогссон. Тиймээс дотоодын цементийн үйлдвэрүүдэд хүсэлт тавьж, ажилласан төдийгүй Дархан-Улаанбаатар чиглэлийн замын ажилыг цементээр хангах үүрэг хүлээсэн. Өдөрт 1000 орчим тонн цемент авахад, нэг урсгал, хоёр эгнээ замыг ашиглалтад оруулах боломжтой гэж харж байгаа" гэж хэлсэн.
Тэгвэл тун удахгүй сайдын хэлсэнчилэн Дархан хүртэл тоос татуулан давхихгүй, толь шиг шинэ замаар хурдлан хүрэх боломж бүрдэх нь.
