Памирын нурууны Ленин (7134м) оргилд соло авиралт хийж явсан Цэгц клубийн тэргүүн Х.Бумхишиг хөлөө хөлдөөсний улмаас 5800м өндөрт бууж чадахгүй гацсан тухай бид өчигдөр мэдээлсэн билээ.
МУҮХ-ны Аврах ажиллагаа, эрсдэлийн удирдлага хариуцсан дэд ерөнхийлөгч С.Ганхүү, Жаргалант клубийн уулчин Э. Даваадоржийн хамтаар 2022 оны 9 дүгээр сарын 8-ны өдөр Улаанбаатараас мордсон билээ.
Тэд Кыргызстан улс дахь Монгол Улсын Элчин сайдын яамтай хамтарч ажиллаж байгаа бөгөөд аврагчдыг Бишкек хотод бууснаас цааших бүх асуудлыг саадгүй бүрэн шийдэх юм. Уулчин Х.Бумхишигийн биеийн байдал сайн, хоол ундны байдал хүрэлцээтэй бөгөөд 5 дахь хоног дээрээ ууланд байгаа аж.
Ленин оргилд цаг агаарын байдал тааламжтай, салхины хурд тогтмол хэвийн, хур тунадасгүй байгаа урьдчилсан мэдээ ирсэн байна.
Холбооны Аврах ажиллагаа хариуцсан Дэд ерөнхийлөгч С.Ганхүүгээр ахлуулсан аврах баг Оше хотод бэлтгэл ажлаа хийн, Kyrgyz Alpine Club-ийн дэмжлэгтэйгээр аврах ажиллагаанд оролцох хоёр уулчин олсон тухай өнөөдөр мэдээлжээ. Гэвч Коржиневский оргилд авиралт хийж байсан уулчид аврах тусламжийн дохио илгээсэн нөхцөл байдал давхцаад байна. Киргизээс уулчдын баг бүрдүүлж эхэлсэн бөгөөд уулчид хүрэлцээ муу байгаа бололтой.
Маргааш буюу 9-р сарын 10-ны өдөрт багтан эрсдэлд ороод буй уулчин дээр хүрэх төлөвлөгөөтэй байна гэжээ. Тус ажиллагааг амжилттай зохион байгуулахад олон нийтээс 2,300,000 төгрөгийн хандив цугласан байна. Та бүхний сэтгэлийн тусламж энэ цаг мөчид маш өндөр ач холбогдолтой байна хэмээн Уулчдын үндэсний холбооноос мэдээллээ
