Үндсэн хуулийн цэцийн дүгнэлттэй холбоотойгоор улс төр хөдөлгөөнд ороод байна. Өнөөдөр ээлжит бус чуулган эхэлснээр Цэцийн шийдвэртэй холбоотой асуудлыг УИХ хэлэлцэж эхэллээ. МАН-ын Удирдах зөвлөл мөн хуралдав. Энэ бүхний гол сэдэв, агуулга нь Үндсэн хуулийн цэцийн дүгнэлттэй холбоотойгоор Засгийн газрын бүрэлдэхүүнд өөрчлөлт орох уу гэдэг л асуудал. Өөрөөр хэлбэл давхар дээлтэй сайд нар Засгийн газрын бүрэлдэхүүнд 4-өөс олонгүй байна гэдэг Үндсэн хуулийн босго шалгуур Цэц дээр бүдэрсэн тул одоо хэдэн ч сайд давхар дээлтэй залрах боломж нээлттэй. Энэ боломж руу УИХ дахь МАН-ын бүлгийн 62 гишүүн бүгд уулгалан дайрч байгаа аж.
Баттай эх сурвалжийн мэдээгээр Засагт өөрчлөлт орох сценари бэлэн болжээ. Хэн хэнийг явуулж, хэн хэн нь үлдэх вэ? Шинээр ямар сайд нар орж ирэх вэ? Үүнд хариулахад юуны өмнө Шадар сайд С.Амарсайхан, Засгийн газрын хэрэг эрхлэх газрын дарга Ц.Нямдорж нар зайгаа тавьж өгөхөөр болсон байна. Мөн Соёлын сайд Ч.Номин, Барилга, хот байгуулалтын сайд Б.Мөнхбаатар, Зам, тээврийн хөгжлийн сайд Л.Халтар, Уул уурхай, хүнд үйлдвэрийн сайд Г.Ёндон, Түлш, эрчим хүчний сайд Н.Тавинбэх, Эрүүл мэндийн сайд Б.Энхболд нарын дан дээлтэй сайд нь намрын эхний хяруунаар жиндэх нь бололтой. Тэдний оронд УИХ-ын гишүүн Н.Учрал, М.Оюунчимэг, Г.Мөнхцэцэг нарын нэр дуулдаж байна. Мөн УИХ-ын гишүүн Б.Саранчимэг, Ц.Мөнх-Оргил, С.Бямбацогт, Х.Болорчулуун гээд сайдын суудалд санаархагчдын чамгүй урт цуваа бий. Хууль зүй, дотоод хэргийн сайд Х.Нямбаатарыг Шадар сайдаар тавих яриа явсан ч Х.Нямбаатар өөрөө дургүй байгаа гэнэ. Уг нь Х.Нямбаатарыг дэвшүүлээд оронд нь УИХ-ын гишүүн Ж.Сүхбаатар, Б.Энхбаяр нарын нэгийг тавих тохироо хийгдсэн юм байна.
Ерөнхий сайд Л.Оюун-Эрдэнэ Засгийн газарт орох энэ өөрчлөлтийг яаравчлах байр суурьтай байгаа бөгөөд, намрын их ажлын өмнө халаа сэлгээг хурдан дуусгаж, шинэ сайд нарыг ажилд нь оруулах чигтэй байгаа аж.
