АН-ын ээлжит бус Их хурал болж өндөрлөлөө. Аль АН-ынх нь вэ гэдэг асуултад Х.Баттулгын АН гэж шуудхан хариулах нь онох байх. Хурал дээр АН-ын дарга гэгдэж байгаа Х.Баттулга манай намын хэсэг хүн эрх баригч МАН-ын гар хөл болж байна. Гэхдээ эвлэлдэж чадвал 2024 онд АН ялалт байгуулна гэх зэргээр уянгалуулжээ. Эв нэгдэл хэрэгтэй байна гэсэн хэрнээ яаж нэгдэх тухайгаа ярилцаагүй, шийдэл гаргаагүй нь хачирхалтай.
Х.Баттулгад үнэнч байсан хэдэн хүнийг албан тушаалд томилсон байна. Ардчилсан намын Ерөнхий нарийн бичгийн даргын үүрэг гүйцэтгэгч И.Мөнхжаргалыг Ерөнхий нарийн бичгийн даргаар жинхэлсэн байна. Харин Ардчилсан намын Тэргүүн дэд даргаар Ө.Шижир, АН-ын дэд даргаар Ш.Түвдэндорж, Б.Ган-Очир, Д.Бадарсан, Т.Пүрэвхатан, О.Алтангэрэл нарыг Ардчилсан намын Ээлжит бус Их хурлаар олонхийн саналаар томилжээ.
Энэ удаагийн хурал АН-д ялах боломж байгаа гэх мэт улигт мэссэжээр гишүүдээ сэрээх, идэвхжүүлэх гэсэн ганц нэг оролдлогыг эс тооцвол шинэ зүйл байсангүй. Үзэл санаа, үнэт зүйлээ хамгаалсан, эрх баригч нарыг чичрүүлэм дуу хоолой энэ хурлаас гарсангүй. Үндсэн хуулийг дахин өөрчлөх тухай ид ярьж байгаа, давхар дээл өмсөх боломж гарсан энэ цаг үед АН-ыхан МАН-аас албан тушаал авах гэж хэлбэрийн төдий идэвхжилт хийсэн гэж зарим хүн ээлжит бус Их хурлыг дүгнэж байна лээ.
Үндсэн хуулийн цэцэд гомдол гаргасан хоёр гишүүн бол Ш.Адьшаа тэргүүт Х.Баттулгын талынхан. Тэд маргаан үүсгэснээр УИХ-ын гишүүд сайд болох буюу давхар дээл нөмрөх боломж нээгдсэн юм. Тиймээс энэ хоёр гишүүнийгээ засагт сайдаар шахах ажиллагаа ийн эхлэв бололтой.
