Үндсэн хуулийн цэцийн Их суудлын хуралдаанаас УИХ-ын 4 хүртэлх гишүүн Засгийн газарт ажиллаж болно гэсэн заалт Үндсэн хууль зөрчсөн гэсэн дүгнэлт гаргасныг ХҮН-ын дарга Т.Доржханд мэдээлэв. УИХ-д суудалтай намын дарга ийм зүйлээр эрхбиш тоглоом хийгээгүй байх. Цэцийн хэвлэлийн төлөөлөгч шиг ажиллаж, өмнөөс нь мэдэгдэл хийснийгээ Үндсэн хуульд өөрчлөлт оруулах боломж гарлаа, ардчиллын гажуудал засагдах боломж нээгдлээ гэж тайлбарласан. Т.Доржхандын хэлж буйгаас үзвэл Үндсэн хуульд дахиад өөрчлөлт оруулж, гишүүдийн тоог нэмэх шаардлагатай гэнэ. Хязгаар үгүй болбол УИХ-ын гишүүд бүгд сайд болох гэж хөлөө хугалах шахан гүйлдэх нь тодорхой.
Нөгөө талд Цэц Үндсэн хуулийг тодорхойлох эрх мэдэлгүй гэж хуульчид дуугарлаа. Цэц Үндсэн хуулийг дагалдаж гарсан хуулиуд Үндсэн хууль зөрчсөн эсэхийг хянах, манах үүрэгтэй. Гэтэл өчигдрийн хуралдаанаар гарсан шийдвэрээр Үндсэн хуулийн заалт өөрөө Үндсэн хуулийн заалтыг зөрчсөн гэсэн нь эрх мэдлээ хэтрүүлсэн, улс төрийн захиалгаар гаргасан дүгнэлт гэж тайлбарлаж байна. УИХ дахь АН-ын зарим гишүүн Цэцийг яаралтай татан буулгая гэж бичсэн байна лээ. Цэц бол Үндсэн хуулийг манар үүрэгтэй болохоос махлаад юу ч биш болгох эрхгүй нь үнэн. Хуульчдын бухимдал оргүй биш.
Цэцийн Их суудлын хуралдааны шийдвэр бол эцсийнх. Үүнийг өөрчлөх эрх мэдэлтэй байгууллага байхгүй. Төрийн эрх барих дээд байгууллага УИХ-д ч ийм эрх мэдэл оногдоогүй. Хуулийн адил хүчин төгөлдөр үйлчлэх тул 2019 онд Үндсэн хуульд оруулсан давхар дээлийг халах зорилготой заалт хүчингүй болно гэсэн үг. УИХ ээлжит бус чуулганаа яаралтай зарлах сураг дуулдаж байгаа ч Цэцийн Их суудлын хуралдааны шийдвэрийг хэлэлцэх боломжгүй. Тийм учраас шууд Үндсэн хуулийн өөрчлөлтийг хэлэлцэх үү гээд маш олон эргэлзээ үүсэж байна. УИХ дахь АН-ын хоёр гишүүний гаргасан маргааны талаарх шийдвэрийг ХҮН-ынхан танилцуулсан үйл явдалд давхар дээлийг эсэргүүцэн жагсаж цуглаж явсан МАН ямар байр суурьтай байгаа нь бас л эргэлзээтэй.
