Ковидын дараах сэргэлтийн нөхцөл байдлаар БНХАУ-аас Монгол Улс руу нислэг үйлдэх зөвшөөрөл олгосон. Хятад улсын тээврийн яам болон онцгой комиссоос хэд хэдэн шаардлага тавьсан. Улаанбаатараас Хятад руу нисэж байгаа зорчигчид Монгол Улсад нислэгээсээ өмнө тав хоног карантилагдана. Түүнчлэн нисэж очсон хотдоо 14 хоног карантилагдах зайлшгүй шаардлага тавигдаж байгаа. Мөн агаарын тээврийн компаниудад тухайн зорчих орон нутгаасаа давхар зөвшөөрөл авахыг шаардаж байгаа. Жишээ нь, Улаанбаатараас Бээжин нисэх зорчигчид "Эйр чайна" компаниар Бээжин-Улаанбаатар, Улаанбаатараас Хөх хот орно. Хөх Хотод мөн 14 хоног карантилагдана.
Тэндээс цаашаа Бээжин явах зөвшөөрлөө авна. Монголын агаарын тээврийн компаниудын хувьд МИАТ компани Улаанбаатар-Гуанжоу-Улаанбаатар гэсэн чиглэлээр ниснэ. Карантины хугацаа мөн адил 14 хоног. МИАТ компани Улаанбаатар талаасаа 75 хувийн дүүргэлттэй явах шаардлагыг Хятадын талаас тавьж байгаа. "Аэро Монголиа" компанийн хувьд Улаанбаатар-Хөх хот чиглэлд нислэг үйлдэхээр төлөвлөж байна. Одоогоор Хөх хотын нисэх буудлаас нислэгийн зөвшөөрөл нь хараахан ирээгүй байна. Зөвшөөрөл ирвэл "Аэро Монголиа" компани шууд нислэг үйлдэхэд бэлэн. БНХАУ-д очоод тусгаарлагдах 14 хоногийн зардлаа зорчигч өөрөө хариуцна. Мөн дотоодод тусгаарлагдах буудлын зардлыг иргэн өөрөө хариуцах болно гэсэн тайлбарыг ИНЕГ-ын дарга С.Мөнхнасан өглөө.
