УИХ-ын гишүүн Т.Доржханд:
-"Өнгөрсөн баасан гарагт УИХ хаалттай хуралдаж, Хөгжлийн банктай холбоотой гишүүдээ хамгаалж үлдлээ. Ийм УИХ-д хэн итгэх вэ. Хулгайтай холбогдсон гишүүдийн асуудлыг нууцаар хэлэлцэж, олонхоороо хамгаалан үлдэнэ гэдэг маш хариуцлагагүй үйлдэл. Иймээс цаашид УИХ-ын үйл ажиллагаанд оролцох боломжгүй гэдгээ албан ёсоор мэдэгдэж байна" гэлээ. Мөн "Эдийн засгийн нөхцөл байдал, нийгмийн амьдрал, улстөрийн асуудал гээд болж байгаа бүхий л зүйл засаглалын тогтолцооноос шууд хамааралтай. Үндсэн хуульд нэмэлт өөрчлөлт оруулж Монгол улсын засаглалын тогтолцоонд өөрчлөлт оруулах шаардлагатай" хэмээв.
Түүнчлэн тэрбээр УИХ-ын танхим дотроос биш Сүхбаатарын талбайгаас тэмцлээ илэрхийлэхээ мэдэгдэж пүрэв гарагт буюу тавдугаар сарын 5-ны өдөр 12:00 цагт Сүхбаатарын талбайд "Өөрсдөө өөрчил үгүй бол тар" гэдэг тайван жагсаалыг эхлүүлэх бөгөөд үүнд залуучуудыг мөн уриаллаа.
