Зурагтын дэнж дээр орших байшинд зун өвөлгүй дажин өрнөдөг болсоор удлаа. Томилогдсон дарга нь тогтохгүй, тогоон доторх уран бүтээлчид нь нүдэндээ галгүй болсоор олон оныг үдэв. МҮОНРТ-ийн гүйцэтгэх захирлыг хэдхэн өдрийн өмнө АТГ-аас саатуулж, тайлбар авсан байсан. Зарим хэвлэл баривчлаад аваад явлаа ч гэж мэдээлсэн. Аль нь ч үнэн байсан МҮОНРТ-д асуудал байна аа л гэсэн үг. Чөлөө завсаргүй өрнөсөн халаа сэлгээний дараа ажилчид нь удирдлагуудаа АТГ-т матаж, улстөрчдөөр крандуулж очсон дарга нар нь уран бүтээлчдэд эр бяраа үзүүлдэг жишиг амь бөхтэй тогтчихсон.
УИХ-аас 2005 онд Олон нийтийн радио, телевизийн тухай хуулийг баталснаас хойш 17 хавар улирчээ. Одоо бол энэ хуулиар МҮОНРТ олон нийтийн гэх цор ганц статустай байгууллага. Үндэстний дангааршил, давтагдашгүй өв соёл, тусгаар тогтнол, соёлын болон бусад соён гэгээрүүлэх үйлсэд МҮОНРТ онцгой чухал байр суурьтай. Тэр ч утгаараа МҮОНРТ-д онцгой статусыг хуулиар олгосон байдаг. Харин энэ онцгой үүргээ сэтгүүл зүйн хараат бус зарчмаар бүрэн дүүрэн биелүүлж чадаж байгаа эсэхэд үзэгч, сонсогчид дундуурхан сэтгэд ханамжтай явдаг нь нууц биш.
МҮОНРТ улс төрөөс шууд хамааралтай байгууллага болж хувирсан. Ямар нам, эвсэл засгийн эрхэнд гарна яг түүнээс хамаарч халаа сэлгээ, бужигнаан үүсдэг. Ялангуяа энэ байгууллагын удирдлагууд улс төрөөс, улстөрчдөөс шууд хамааралтайгаар томилогддог. Дээрээс нь улсын төсвөөс санхүүждэг. Арилжааны телевиз, радио шиг өөрсдөө орлого олоод санхүүжих боломжийг нь хуулиар хязгаарласныг үзэгч, сонсогчид мэддэггүй. Төсөв батлах болохоор өнөөх 76-г лоббидож, өмнө нь бөхөлзөх, ая тал засах, өөрсдийнх нь тухай мэдээ мэдээллийг түлхэх шахаанд орно.
Дэлхийн улс орнуудад олон нийтийн гэх статустай радио, телевиз хөгжөөд олон арван жилийг үдсэн. Манайхаас нэг л зүйлээр ялгаатай. Гадаадын олон нийтийн телевиз, радионууд улсын төсвөөс биш хураамж, олон нийтийн хандиваар санхүүждэг тогтолцоог илүүд үзэж, мөрдлөг болгосон байдаг. Гэхдээ бүх зүйл ил тод нээлттэй, шилэн хөтлөлттэй. Энэ загварыг зориглоод Монголд нэвтрүүлэх цаг болсныг МҮОНРТ-д өрнөж байгаа тэмцэл бослогууд гэрчлэх мэт. Ингэхийн тулд 2005 онд баталсан хуулиа эргэн харж, салхи оруулах шаардлагатай.
Хууль өөрчлөхөд учир бий. МҮОНРТ-ийг шууд санхүүжилтгүй орхиж, арилжааны телевизүүдтэй чөлөөт өрсөлдөөнд ор гэвэл хэдхэн өдрийн дотор сүйрнэ. Тиймээс тодорхой цаг хугацааны босго тавиад аажмаар бие даалгах шийдэл оновчтой байж болох. МҮОНРТ төсвийн угжнаасаа гэнэт салах нь хэцүү ч улстөрчдөөс санхүүгийн болоод бусад зүйлээс хараат амьдардаг байдлаасаа салж амарна. Улстөрчдийг дагахаа больж, уран бүтээлийн эрэл хайгуулдаа гарцгаана. Хамгийн том, бас хүчтэй дэмжлэг бол үзэгч, сонсогчид. Үзэгч, сонсогчид ч, МҮОНРТ-ийн уран бүтээлчид ч зориглон хөдлөх цаг болжээ.
