Ч.Лодойсамбуу: Хотын дарга Х.Нямбаатар сайн дураараа ажлаа өгөх ёстой

УИХ-ын гишүүн Ч.Лодойсамбуу өнөөдөр нийслэлийн асуудлаар мэдээлэл өглөө.

–Сүүлийн үед Туулын хурдны замтай холбоотой асуудал өндрөө авсан. Маш олон хүмүүс эсэргүүцэж байна. Эсэргүүцэх маш олон шалтгаан байгаа. Энэ асуудлаар хянан шалгах түр хороо байгуулахаар одоогийн байдлаар 40 гаруй гишүүн гарын үсэг зурсан. Гэхдээ түр хороо байгуулах ажлаа татаж байх шиг байна. Эрх баригч намынхан үеийн үед ингэдэг. Үеийн үед эхлээд гараа далайдаг, нөгөөх нь нумрах юм бол хоорондоо ярилцаад эхэлдэг. Нөгөөх нь гэдийх юм бол байлдаад эхэлдэг. Хянан шалгах түр хороо байгуулах гээд явж байсан хүмүүс буцаагаад болих тал руугаа хандсан.

Сүүлийн үед төрийн ажил яаж явагддаг болсон бэ гэвэл эхлээд сошиалаар үнэн худал нь мэдэгдэхгүй мэдээлэл цацагддаг. Үүний дараа хянан шалгах түр хороо байгуулдаг. Өөрөөр хэлбэл, хууль шүүхийн байгууллагууд ажлаа хийхээс өмнө асуудлыг сошиалын шүүхээр оруулдаг болсон. Үүний нөлөөгөөр хууль, шүүхийн байгууллагын мөрдөн шалгах ажиллагаа явж, улмаар сошиал орчинд сайн үнэлгээ авсан тохиолдолд шүүх нь дагаж шийдвэр гаргадаг буруу жишиг тогтоод байна.

Хэрвээ өнөөдөр мэргэжлийн байгууллага, хууль сахиулах, мөрдөн шалгах алба гэж үнэхээр байдаг бол Монгол Улсын хууль тогтоомжийг илт зөрчиж, төсвийн 500 тэрбум төгрөгийг үрэн таран хийсэн байж болзошгүй, баримттай энэ асуудлыг шалгах ёстой.

Тухайлбал, Туулын хурдны замын төслийг хэрэгжүүлэхээр ажиллаж буй БНХАУ-ын “China Hyway Group Limited” компанид урьдчилгаа мөнгө шилжүүлсэн санхүүгийн баталгааны хуудас байна. Өөрөөр хэлбэл, “бид энэ төслийг хэрэгжүүлж чадна” гэсэн баталгаанд үндэслэн ийм шийдвэр гаргасан гэсэн үг. Гэвч уг баталгааны хуудсыг хамгийн наад захын санхүүгийн мэдлэгтэй хүн харахад л Монгол Улсын хууль тогтоомжийг зөрчсөн нь илт харагдаж байна.

Ийм баталгааны хуудас үндэслэн төсвийн хөрөнгөнөөс 500 тэрбум төгрөг шилжүүлсэн нь өөрөө бүлэг залилангийн шинжтэй гэмт хэрэг. Тиймээс энэ асуудал дээр хууль сахиулах байгууллагууд ажлаа хийж, шалгах ёстой гэсэн шаардлагыг тавьж байна. Мөн хотын дарга өөрөө сайн дураараа ажлаа өгөх ёстой. Гэтэл Т.Даваадалай гэх орлогч даргаа урдаа гаргаж, нөгөө хүн нь өмнүүр нь хаалт болж, ажлаа өгөх гэж байгаа мэт дүр зураг харагдаж байна.

Өнөөдөр хууль сахиулах байгууллагууд мөрдөн шалгах ажиллагаагаа явуулахгүй байна. Мөн шүүх байгууллага цаг тухайд нь тодорхой, шударга шийдвэр гаргаж чадахгүй байна. Үүний улмаас хэвлэл мэдээллийн байгууллага ч, ард иргэд ч аль нь үнэн, аль нь худал гэдгийг ялгаж итгэхэд бэрх болсон. Эцэст нь хүмүүс хэнд итгэхээ мэдэхгүй байдалд хүрээд байна.

Гэтэл энд цагаан дээр хараар хууль зөрчсөн баримт байна. Үүнд ямар нэгэн тайлбар шаардлагагүй. Тайлбарыг хэн ч хэлж болно, харин түүнд итгэх эсэх нь үзэж, сонсож байгаа хүмүүсийн сонголт. Харин нэг зүйлд сонголт байхгүй нь энэ бол баримт гэдэг асуудал. Хууль бол сонголтоор хэрэгждэг зүйл биш. Тиймээс энэ асуудлыг байгаа баримт, хуулийн хүрээнд ярих ёстой.

Тиймээс Т.Даваадалайгаас гадна НЗД Х.Нямбаатар хариуцлага хүлээх ёстой. Учир нь энэ бүх мөнгөний эрх мэдлийг олгосон, мөн Туулын хурдны замын төслийг эхлүүлэхэд дэмжлэг үзүүлсэн. Түүнчлэн энэ бүхнийг харсаар байж чимээгүй өнгөрсөн Ерөнхий сайд асан Л.Оюун-Эрдэнэ ч давхар хариуцлага хүлээх ёстой.