Эрдэнэт үйлдвэрийн Чанарын хяналтын хэлтсийн удирдлага, хамт олны хүсэлтээр Захиргаа, удирдлага, санхүүгийн газрын дарга Д.Баярбат болон Санхүү, нягтлан бодох бүртгэлийн хэлтсийн дарга, Ерөнхий нягтлан бодогч Т.Очирхүү, Дотоод хяналт, мониторингийн хэлтсийн дарга Б.Энхжин, Хөрөнгө оруулалт, худалдан авах ажиллагааны бодлогын газар, Төлөвлөлт, эдийн засгийн шинжилгээний хэлтсийн холбогдох албаны дарга, мэргэжилтнүүд тус хэлтсийн үйл ажиллагаатай танилцлаа.
Үндсэн цехүүдийн үйлдвэрлэлийн шат дамжлага, технологийн горим, экспортод ачигдаж буй зэс, молибденын баяжмал, гаднын байгууллагаас Эрдэнэт үйлдвэрт нийлүүлэгдэж буй технологийн бараа материал, техник, тоног төхөөрөмжид иж бүрэн хяналт тавьж, үйлдвэрийн газрын чанар, итгэмжлэлийн асуудлыг хариуцан ажилладаг тус хэлтэс өнөөдөр Захиргааны хэсэг, гурван товчоо, химийн, металлын, түлшний, шатах тослох материалын гээд итгэмжлэгдсэн дөрвөн лаборатори, нийт 145 хүний бүрэлдэхүүнтэй ажиллаж байна.
Чанарын хяналтын хэлтсийн дарга С.Ганцогт болон чиглэл хариуцсан мэргэжилтнүүд ажил үйлчилгээний биелэлт, хүлээгдэж буй гүйцэтгэл, үйл ажиллагааны давуу болон сул тал, лабораториудын техник, тоног төхөөрөмжийн найдварт байдал, өртөг зардлыг бууруулах, гаднын байгууллагад үзүүлж буй үйлчилгээг нэмэгдүүлэх замаар орлогоо өсгөх, өрсөлдөх чадвараа дээшлүүлэх боломжийн талаар дэлгэрэнгүй мэдээлэл хийсэн юм. Мөн үйлдвэрлэлийн тогтвортой үйл ажиллагааг хангахад зайлшгүй шаардлагатай хөрөнгө оруулалт, тоног төхөөрөмжийн шинэчлэл, нэвтрүүлэхээр зорьж буй “LIMS” программ хангамжийн ач холбогдлын талаар танилцууллаа.
Захиргаа, удирдлага, санхүүгийн газрын дарга Д.Баярбат, “Эрдэнэт үйлдвэрийн бүтцийн нэгж бүр онцгой чухал үүрэгтэй. Танай хэлтэс үйлдвэрт орж буй, эндээс гарч буй бүхэнд хяналт тавьдаг учир нэн шаардлагатай тоног төхөөрөмжийн үндэслэлийг сайн боловсруулж, захиалгыг “царцаалт”-аас гаргахад анхаарах хэрэгтэй” хэмээгээд хууль, журмын хүрээнд дэмжин ажиллахаа илэрхийлэв.
Тус хэлтэс 2020-2024 онд Эрдэнэт үйлдвэрт учирч болох 87,5 тэрбум төгрөгийн эрсдэлээс сэргийлж ажилласан байна.
