Уртын сайхан дуу хэмээн төсөөлөхөд л говь нутгийн цэлийсэн их тал нүдэнд харагдаж, агь тааны үнэр сэнхийн, цээж дүүрэн салхи сэвэлзэн, уртын дууны шуранхай алсаас сонсогдоод ирэх мэт болдог доо. Аниргүй тэр уудамд эгэл хэр нь эрхэм хүмүүс уртын дуугаа эгшиглүүлж, шуранхай дуугаа хадаан, үеийн үед дурсагдах үнэт өвийг олны сэтгэлд шингээсээр ирсэн, ардын урлагийн үнэт өв соёлыг түгээгч, соёлын биет бус өвийг тээгч ихэр хоёр уран бүтээлч МУСТА Төмөрчөдөрийн Шануу, Рэнцэнгийн Хандсүрэн болон шилдэг олон арван шавийг төрүүлж, урлагийн замд хөтлөн оруулсан дуу хөгжмийн алдарт багш, Ардын Боловсролын Тэргүүний ажилтан, МУСТА, өв тээгч Чойжамцын Шинэбаяр нарийн “ГОВИЙН ЦЭЦЭГС” тоглолт 7-р сарын 17-ны өдөр Дундговь аймгийн Баян жаргалан сумын 100 жилийн түүхэн ойн баяр наадмаар дахин тайзнаа цэцэглэн дэлгэрч, нутаг олноо баясгав.
Хоёр жилийн өмнө Япон улсын Токио хотноо “ГОВИЙН ЦЭЦЭГ” тоглолтыг тус хотноо ажиллаж аж төрөн суугаа Монгол-Японы урлагийн агентлагийн тэргүүн, МУСТА бүжигчин Гүнгээдашийн Бурмаа нь төрлөх нутгийнхаа “Их говийн” үзэсгэлэнт байгалийг бүжгээр урлан толилуулж, монголчууд болон япон үзэгчдийг гайхшруулан цэнгүүлсэн билээ. Түүхэн ойн баярын наадмын өдрүүдэд бороо шивэрсэн, өвсний чийг анхилсан, намуун гэгээн үдэш нутгийн зон олныхоо хүндэтгэлийг хүлээж, ардын урлагийн алтан үеийн уранбүтээлч нарын хамтарсан тоглолт халуун дотноор бялхсан, баяр жаргал, догдлолоор танхим дүүрэн үзэгчидтэй эхэллээ.
Төрсөн нутагтаа, энэ л газар нутгаас ажил амьдрал, хүсэл мөрөөдлийн гараагаа эхэлж байсан бүжигчин Г.Бурмаа ихэр хоёр ээж болон урлагийн замд хөтлөн оруулсан ачит багш нартайгаа энэ удаа тайзан дээр “ГОВИЙН ЦЭЦЭГС” болон өнгө өнгөөр дэлгэрэх цэцэгс мэт “Эх нутаг” бүжгээр уудам шаргал говийн үзэсгэлэнт байгалийн тал нутгийг бүжгийн хэлэмжээр илэрхийлэн бас нутаг усандаа талархан бүжив. Түүний урлагт нэгэн үзүүрт сэтгэлээр зүтгэх хүсэл сэтгэлийнх нь гараа энэ л уудам тал нутгаас эхлэн хүсэл мөрөөдөлд нь гал нэмж, зам жимийг зурайлгасан Ч.Шинэбаяр багшийнхаа сургамжаар бүжгийн урлагийн гайхамшгийг мэдрэн, хүсэл мөрөөдлөөрөө жигүүрлэн, Япон Улсад анх удаа бүрэн хэмжээний монгол бүжгийн тоглолтыг хийсэн.
Японы тайзнаас эхэлсэн энэхүү тоглолтыг МУГЖ Д.Энхгэрэл, СТА Д.Баярт, СТА Бямбасүрэн болон СТА Б.Норовбанзад нар найруулжээ. “Хүн” театрын бүжигчид хамтран оролцож, “Их хүндэтгэл”, “Найрын хөг”, “Дэвсэх тойрон бүжиг”, бүжгээ толилуулан, баяр дээр баяр нэмэн, хөг хэмнэл, цог золбоо болж гялалзлаа. Бага залуугаасаа дуулж, хуурдан, сайн дурын уран сайханч болон урлагийн хамтлаг байгуулж, өвөг дээдсийнхээ их өв уламжлал болсон боржигон ардын дуу, “Ум арзай” аялгуу, малын уриа дуудлага зэрэг нандин сайхан бүтээлүүдээ ихэр хоёр уран бүтээлч эгшиглүүлэн сонордуулав. Ахмад гурван уран бүтээлчийн хамтын бүтээл болох “Ембүү гэгээн шүтээн” аялгуут магтаалаа хайлж, Ч.Шинэбаяр багш чулуун хөгжмөөр сонгодог “Уран хас” бүжгэн жүжгийн хөгжмийн хэсгийг аялгуулж, зээ хүү Ц.Будрагчаа нь хуурдан “Морьтон монгол” бүтээлийг цээл сайхан хоолойгоороо цуурайтуулан, шавь Э.Дашжаргал “Уртын дуундаа би хайртай” дууг нь дуулж зочноор оролцов. Бас өөрийнх нь найруулга, хөгжмийн эвлүүлэг болох “Ардын дууны найруулга” хэмээх бүтээлд баян хуур, аман хуур, цан бөмбөртэй хоршуулан хөгжимдөж эгшиглүүлэв. Ийм л олон талын авьяас билэг ундарсан, дуу хоолой нь огтхон ч цуцахгүй байгаа нь үнэхээрийн сэтгэл хөдлөм, хаанаасаа тэр их хүчирхэг дуу хоолой, харьж цуцашгүй их уянга ундарна вэ хэмээн гайхан бишрэн, амьсгал даран сонсож, уярч суулаа. Тус тоглолтыг яруу сайхан, ёслол төгөлдөр, эрхэмсэг бадрангуй зарлан танилцуулж байсан нь СУИС-ийн Театрын урлагийн сургуулийн багш, дуучин С.Гантулга хөтөлсөн юм. Мөн тус тоглолтыг хүндэтгэн Монголын хөгжмийн зохиолчдын хорооны тэргүүн Г.Түвшинтөр хүрэлцэн ирж “Энэ гурван сайхан уран бүтээлчдийн өөрсдийнх нь зохиосон, дахин давтагдашгүй унаган эх бүтээлүүд ёс заншилтай гүн холбоотой мөн гүн гүнзгий утга төгөлдөр, уртын дууны боржигин дэгийн дуучдын өвөрмөц сайхан тоглолт боллоо” хэмээн өгүүлж байсан юм.
Өөр хаана ч байхгүй цор ганц мөн чанарыг агуулсан их өв соёл, дуу хуурыг сэтгэл зүрхэндээ тээж, үеийн үед мөнхлөн, нандигнан явдаг өв уламжлалаа үеэс үед өвлүүлдэг, залуу үеийнхний сэтгэлд монгол ахуйгаас үүдэлтэй монголоо гэсэн сэтгэлгээний үрийг тарьж, ургац болгож байдаг, цаг хугацааг аялгуугаар хэмжигч, сэтгэл зүтгэл, мятаршгүй, алдрын эзэд, таниулан сурталчлагч ийм л сайхан уран бүтээлчдийн тоглолтыг үргэлж зохион байгуулдаг продюсер Г.Бурмаад талархах нь зүйн хэрэг билээ..
Ахмад уран бүтээлчдээ хүндлэн дээдэлж, үеийн үед алдаршуулан, өвлөн үргэлжлүүлэх их үйлсийн нэгэн хэсэг энэхүү тоглолт ямархан үнэ цэнтэй, чамгүй их зардлаар боссоныг хэр их хүн мэдэж, үнэлж, хүлээж авсан бол…Юутай ч нутгийн шавилхан бүсгүй энэ бүхнийг зорьж хийгээд, хүн бүрийн сэтгэлд хоногшин үлдэх гайхалтай, давтагдашгүй агшныг бүтээгээд, зорин ирсэн зон олонд бэлэг болгон барьжээ.
Урлагийн тэнгэр Янжинлхам бурхан үргэлж ивээж байг ээ.
Х.Эрдэнэцэцэг
