Улсын хэмжээнд 16 орчим сая толгой малыг эдийн засгийн эргэлтэд оруулах тооцоо гарсны 10 орчим сая нь дотоодын хэрэгцээнд, 6 сая нь экспортод гаргахаар төлөвлөсөн. Мах экспортлох орны тоо тодорхой хэмжээнд нэмэгдэж байгаа. Мөн 21 аймгийн түвшинд Улаанбаатар хотод жил бүр уламжлал болгон зохион байгуулдаг өвлийн идэш арга хэмжээг явуулахаар төлөвлөж байна гэж албаныхан хариулт өгсөн юм. УИХ-ын чуулганы танхимд мэдээлэл өгсөн албан тушаалтнуудын хэн нь ч хавар махны үнэ тэнгэрт гаргахгүй, зудын эрсдэл болоход би хариуцлага хүлээнэ гэж хэлсэнгүй. Сонгуулиар тараасан баахан халамжаараа гул бариад өвлийг угтаж байгаа дүр зураг харагдсан. Эрсдэлийг улс төрчид биш малчид өөрсдөө л амьдралаараа үүрнэ.
Нийслэлийн хүн амын 2024-2025 оны өвлийн улирлын хүнсний хэрэгцээнд 5500-6000 мянган тонн мах бэлтгэх тооцоо гаргажээ. Энэ нь өмнөх жилүүдээс буурсан үзүүлэлт. Тиймээс хавар Улаанбаатарт махны үнэ тэнгэрт хадна гэсэн үг. Нийслэлийн 2025 оны төсөвт 7.9 тэрбум төгрөгийн хүүгийн татаасыг суулгах юм байна. хөдөө аж ахуйн салбарт “Хүнсний хувьсгал”, “Цагаан алт” хөтөлбөрүүдийн хүрээнд арилжааны банкны эх үүсвэрийг ашиглаж аж ахуйн нэгжүүдэд зээл олгох асуудалд Засгийн газрын зүгээс хөнгөлөлттэй зээлийн хүүгийн татаас дээр дэмжлэг үзүүлдэг. Малчид руу чиглэсэн сүү, ноос, арьс ширний урамшууллыг үргэлжлүүлнэ гэсэн тайлбарыг дарга нар өгсөн.
Зуд болоход дарга нар очиж өгсөн ганц боодол өвсөөрөө тэнгэрт тултал шоудаж сэлфи хийнэ, харин малчид сэг зэмтэйгээ малынхаа хотонд үлдэнэ. Тиймээс эрсдэлээс сэргийлэх бэлтгэл хийхэд одоо ч оройтоогүй. Зудын эрсдэлийн ерөнхий үнэлгээг хийхэд Архангай, Баян-Өлгий, Говь-Алтай, Завхан, Сүхбаатар, Төв аймгийн хэмжээнд эрсдэлийн түвшин “маш их”, Говь-Сүмбэр, Өвөрхангай аймгийн хэмжээнд “их” буюу дунджаас дээш, улсын хэмжээнд зудын нөхцөл байдал “дунд” түвшинд үнэлэгдсэн байна лээ шүү. Гамшиг хаалга тогшоод эхэлсэн...
