Хүйтний эрч чангарч байгаатай холбогдуулан дунд сургуулийн сурөагчдын амралтыг 12 сард багтаах шийдвэр гарсан тухай сошиал орчинд нийтэлж эхлэв. Тодруулбал, Ерөнхий боловсролын сургуулийн сурагчдын амралт нэгдүгээр сарын 8-ны өдрөөс эхлэх байсныг сайдын тушаалаар наашлуулахаар болов гэсэн мэдээлэл түгээж байгаа юм. Тэгвэл энэ хуваарийг урагшлуулах талаар яамнаас ямар нэгэн шийдвэр гаргаагүй байгаа аж.
Харин Боловсролын ерөнхий газраас сурагчдын амралтыг долоо хоногоор урагшлуулах тооцоо гарган БСШУ-ы яаманд хүргүүлжээ.
Өнгөрсөн жилүүдэд Ерөнхий боловсролын сургуулийн хичээллэх хуваарийг гурван улирлаар тооцож байсан бол 2023-2024 оны хичээлийн жилийн бүтцийг дөрвөн улирал болгож хичээллүүлэхээр баталсан байна.
Эхний улиралд есөн долоо хоног хичээллэн арваннэгдүгээр сарын 6-нд амарч, тус сарынхаа 13-ныг хүртэл, хоёрдугаар улирал найман долоо хоног хичээллэх бөгөөд 1-9 дүгээр ангийнхан гурван долоо хоног, 10-12 дугаар ангийнхан хоёр долоо хоног амрах юм байна. Харин гуравдугаар улиралд есөн долоо хоног хичээллэж нэг долоо хоног, дөрөвдүгээр улиралд бага ангийн сурагчид найман долоо хоног, дунд ангийнхан есөн долоо хоног, ахлах ангийнхан 10 долоо хоног хичээллэхээр энэ хичээлийн жилийн төлөвлөгөөг БСШУ-ы сайд баталсан байна.
