Мөч тайрагдах мэс засалд орсны дараах сэтгэл зүйн асуудал нь хувь хүн бүрт хүчтэй цочрол өгч, дасан зохицохуйн хямрал үүсгэдэг тул үйлчлүүлэгчдийн сэтгэл зүйн нөхцөл байдлыг дэмжиж, амьдралын чанарыг дээшлүүлэх зорилгоор ГССҮТ-ийн Сэргээн засах эмчилгээний тасгийн сэтгэлзүйч А.Пүрэвцэрэн “Дэмжих бүлгийн уулзалт”-ыг санаачлан 2018 оноос хэрэгжүүлэн иржээ. Энэ удаагийн “Дэмжих бүлгийн уулзалт” энэ сарын 14-ны өдөр болох бөгөөд “Ахиллис Монгол” олон улсын байгууллагын салбарын үүсгэн байгуулагч, багш, судлаач, хиймэл хөлтэй марафончин О.Саранчулуун оролцож мэс засалд орсон үйлчлүүлэгчидтэй уулзаж, сонирхолтой яриа өрнүүлэн, санал сэтгэгдлээ солилцоно.
Тус уулзалтаар мөч тайрагдах мэс засалд орсон үйлчлүүлэгчдийн эрүүл мэнд болон нийгмийн харилцааны тулгамдсан асуудал, шийдвэрлэх арга зам, өдөр тутмын зан үйл, амьдралын чанарыг дээшлүүлэхэд чиглэсэн олон талын зөвлөгөө, мэдээлэл бүхий сэтгэл заслын тусламж үйлчилгээг ГССҮТ-ийн Насанд хүрэгсдийн гэмтэл согогийн тасаг, Гар сарвуу нөхөн сэргээх бичил мэс заслын тасаг, Сэргээн засах эмчилгээний тасгийн эмч нар, хөдөлгөөн болон хөдөлмөр засалч нартай хамтран үзүүлдэг аж.
Бэлтгэсэн: И.Энх-Амгалан
