Монголын нефть, хийн үндэсний ассоциацынхан өнгөрсөн сард ОХУ-ыг зорьж Роснефть компанитай шатахуун худалдан авах гэрээгээ 5 жилээр сунгаад иржээ. Энэ удаагийн хэлэлцээгээр хэд хэдэн тохиролцоо хийсэн байна. Нэгдүгээрт, дизелийн түлшийг зах зээлийн ханшаас 10 хувийн хөнгөлөлттэй үнээр авахаар болсон байна. Зах зээлийн ханшийг Сингапурын биржийн ханшаар урьдын адил тооцно.
Хамгийн өргөн хэрэглээтэй АИ92 шатахууны тухайд одоогийн үнийг 2023 он дуустал тогтвортой мөрдөхөөр тохиролцжээ. Гэхдээ зах зээл дээр нефтийн бүтээгдэхүүний үнэ огцом савлаж, өндөр хувиар нэмэгдвэл энэ тохиролцоогоо эргэн харна гэдгийг гэрээнд тусгаж. Тэгэхээр АИ92 шатахууны үнэ 2023 оныг дуустал 100 хувь тогтвортой байна гэсэн үг биш, үнийн хэт өсөлт үүсвэл нэмэгдэж болзошгүй гэсэн үг.
ОХУ-аас шатахуун худалдан авах гэрээг таван жилээр сунгасан байна. Гэхдээ шаардлагатай тодотголуудыг жил бүр хийгээд явах ажээ.
