Эрх баригч МАН-ын Удирдах зөвлөл өнөөдөр хуралдаад Бага хурлаа ирэх сарын 6-нд хийхээр товлов. Энэ хурлаар УИХ-ын дэд даргад хэнийг нэр дэвшүүлэх талаар ярилцахаар төлөвлөж байсан ч тодорхойгүй шалтгаанаар томилгоог огт хэлэлцэлгүй орхижээ. Баттай эх сурвалжуудын мэдээлж байгаагаар УИХ-ын гишүүн С.Чинзориг, Ц.Даваасүрэн нар УИХ-ын дэд даргад албан бусаар яригдсан байна. Парламентад энэ хоёроос ч олон сонгогдсон гишүүд байгаа ч тэд сайд, эсвэл Байнгын хорооны даргын томилгооноос бялуу хүртсэн тул хамаарахгүй.
Ц.Даваасүрэн УИХ-ын дэд дарга болох боломж байгаа ч өөрөө хүсэхгүй байх. Яагаад гэвэл намынхаа даргын тэргүүлсэн Засгийн газрын эсрэг ажиллах болсон. Сангийн сайдыг огцруулах бичиг өргөн барьсан. Ер нь том утгаараа Засгийн газрын бодлого, үйл ажиллагаа Ц.Давасүрэн гигүүнийн таалалд бүрэн нийцэхгүй байгаа юм. Хэрэв УИХ-ын дэд дарга болчихвол албан тушаалаар амаа үдүүллээ гэдэг нэр хоч зүүнэ. Тийм учраас Ц.Даваасүрэн ёс зүйн хувьд дэвших эрхгүй, өөрөө ч хүсэхгүй байгаа гэж хэлж болно. Ингэхээр С.Чинзориг гишүүн ганцаараа тунаж, УИХ-ын дэд даргаар сонгогдох нь тодорхой болжээ.
